李施嬅爭視后最想惠英紅投我票!

東方日報
陳山聰與李施嬅食住上拍檔登台,反應甚佳。

李施嬅昨日性感出席活動為無綫台慶頒獎禮熱身,對於視后之爭,她表示若得到勁敵惠英紅投她一票已當贏,但又直認恨攞視后,笑說:「我嗰票會投畀自己。」

無綫台慶頒獎禮將於星期日舉行,「視后」大熱的李施嬅昨日以低V露背連身褲出席酒店開幕活動,她笑說:「嚟緊頒獎禮,想先感受一下盛裝,今年特別緊張,係最有機會一年,但係競爭對手好強,係影后惠英紅、楊千嬅,自己都驚驚哋。同紅姐比真係差幾班冇得鬥,最想佢投我一票,佢肯投我已經覺得贏咗,信心會大增,但係我會投番自己一票。」她表示很久沒試過如此緊張,因入行16年也未曾競逐「視后」,坦言想贏。

講到頒獎禮戰衣,她指拍檔陳山聰令她感到壓力:「山聰着衫一向好爆,令我搵衫有壓力,依家搵咗兩套,會畀佢睇吓覺得邊套好。(性感?)企喺山聰旁邊都畀佢搶晒!」

美國登台搵真銀

另外,這對螢幕好拍檔早前合體到美國登台搵真銀,並首次同台合唱劇集歌曲《今宵多珍重》,李施嬅說:「我哋分開唱過,網民一直好想我同山聰合唱。我彈埋琴,首歌一起自己都毛管戙,諗番好多劇集畫面,觀眾反應亦好熱烈,套劇唔止香港觀眾,連海外華人亦有睇,真係好感動。」她指觀眾的支持就如充電寶,不停為她加油充電。李施嬅今次到美國亦忙裏偷閒去滑雪,她說:「喺加拿大由細到大都有滑雪,讀大學更加係一星期滑足三、四日。今次撞啱旺季,加上嗰個係美國五大滑雪場,所以酒店好貴,成萬幾蚊一晚,不過好難得可以工作之餘順道享受滑雪。」

近期曝光率甚高的李施嬅,穿上低胸裝出席活動。