李施嬅比喻冇結果愛情

東方日報
李施嬅獲網民捧為「視后」,揚言諗都未諗過。

李施嬅於無綫熱播劇《金宵大廈》中一人分飾兩角大過戲癮,演技向來備受肯定的她,竟多次重申冇諗過拎視后,更比喻為一段沒結果的愛情,不應執着。

效力無綫16年的李施嬅,今年4月宣布約滿離巢,《金》劇成為她離巢後倒數的第二部作品,劇中她分別飾演舞女Coco及空姐,兩個角色互相牽引,關乎前世今生兩個故事,令她相信有因必有果。自認保守的她笑言今次豁出去挑戰誘人戲份:「做Coco嘅時候要畀臨時演員摸手摸腳同攬腰,仲要食煙,但佢哋仲驚過我,反而要我做主導。」

與陳山聰激烈神交

她跟陳山聰亦有不少親熱場口,最難忘的是挑戰一場「神交」戲:「場戲係佢送我返屋企,兩個互望食煙,我吸一啖望住佢,吹啲煙出嚟,佢又拎我支煙食,感覺上好似用眼神發生激烈關係,但全部都係用眼神、動作形態去交代。」她大讚山聰是位好對手,合作有安全感,又帶挈她經常有靚湯飲:「佢女友Apple好好,好明白事理,包容好多嘢,仲成日煲湯,要一個圈外人接受我哋呢個行業唔易。」

結婚不求任何儀式

新劇播出幾日已大獲好評,不少網民揚言無綫欠她一個「視后」寶座,施嬅卻睇得開,以平常心對待,沒有這個想法:「山聰今次發揮得好好,又就嚟結婚,希望佢雙喜臨門。(你拎咗又宣布喜事?)咩喜事?冇呀!依家專注事業,就算拍拖都唔想公開。(結婚先公布?)未必會,係好私人嘅事,如果對方冇要求,未必會擺酒,簽字都得,有冇儀式都冇咩所謂。(恨拎獎?)冇諗好耐啦真係,唔係可以控制到嘅嘢,有獎會係開心事、係禮物,但冇呢個獎,我依然對事業好滿足,唔好咁執着,呢個世界好大,可以見識好多嘢。」她更將之比喻為愛情:「就好似你去愛一個男人,佢唔愛你,仲要執着就遇唔到更好,我好信呢樣嘢。」講到衝出亞洲殺入荷里活影視圈,她說暫時未知去向,待所有事落實後會跟大家分享,有時間會自我增值。

場地:OysterMine

李施嬅大讚陳山聰是個難得的好對手。