【李兆基逝世】霸氣又好笑 幾個基哥經典角色

近年不時有關資深演員李兆基(基哥)健康情況嘅報導,受病痛困擾嘅佢積極接受治療,今日得知因病離世嘅消息,深感難過。基哥人生本來就充滿戲劇性,後生時做過「慈雲山十三太保」又吸過毒,後來改邪歸正,成為演員嘅佢拍過無數香港電影,由惡人、社團大佬、喜劇演員同慈父,每次演出令人難忘!

上國際權威電影資料庫IMDB網站一睇,基哥嘅電影資歷非常可觀(係!基哥喺IMDB有一版!),從影以來參演過95部電影,監製過29部戲,編寫都有10部,仲未計大量義氣幫忙嘅作品,長長一頁紀錄,係佢身為港產片重要一員嘅証明。

「四大惡人」之一嘅李兆基以惡人角色起家,《古惑仔》入面嘅社團大佬「吹水基」廣為人知,但正正因為呢個形象,佢拍喜劇出嚟嘅反差效果好強勁!我地最鍾意應該都係基哥嘅喜劇演出。好似喺《食神》入面飾演「鵝頭」,同莫文蔚嘅雞姐係對頭人,兩個因為一粒「爆漿瀨尿牛丸」而破冰,試食過後更拍出經典沙灘慢鏡頭一幕!

「從來冇試過咁清新脫俗嘅感覺,牛肉嘅鮮味,瀨尿蝦嘅甜味,結合一齊嘅味道竟然比老鼠斑有過之而無不及,比我嘅初戀更詩情畫意。所謂舉頭望明月,低頭思故鄉,好詩好詩」。夠膽叫基哥咁拍嗰個好嘢,不顧身世演得夠放嘅基哥更好嘢。

仲有《行運一條龍》飾演茶仔伙記「基哥」,平日妙論天文地理,一班伙記吹水講起「佢居然話巴西首都係利智喎,稍為有地理常識都知,利智對胸再大,都唔會係巴西首都啦!」。我認為呢句經典過《行》成日有人講嗰句「初四咁嘅樣」。

仲有《喜劇之王》客串做收佗地大佬,面對「甜筒輝」嘅挑釁,「小基基」被彈,面對手持雙刀衝埋嚟「甜筒輝」都不為所動,霸氣得嚟又好好笑!

喜劇之外,基哥做正劇都一樣出色。喺電視劇《縱橫四海》飾演崔瑞基,同歐錦棠、林偉健做父子,身為市井小市民嘅佢吓貪小恩小惠,但對於兒子義無反顧,每次有事想盡辦法營救,對街坊明星(葉德嫻 飾演)多年來密密守護不求回報,充份發揮鐵漢柔情。

基哥,我地會記得你,一路好走!