李佳芯被飛出局翻生無望!

東方日報
李佳芯曾放口風想拍《白2》,但最終事與願違。

無綫藝人李佳芯早前因政治風波,遭公司「雪藏」!據知,10月開拍的《白色強人2》,雖然劇中演員放口風希望原有班底一齊拍攝,但李佳芯依然被Out,「翻生」無望。而馬國明與唐詩詠屆時要到內地開工,二人均稱不擔心疫情,相信公司有妥善安排。

「最佳劇集」《白色強人》鐵定10月開拍第二輯,上輯飾演「程醫生」的李佳芯(Ali)於結局生死未卜,早前因捲入政治風波,一直未被解凍。據知,她繼《BB大晒》與《踩過界Ⅱ》後,《白色強人2》亦繼續被飛出局,無望「翻生」。

馬國明想原班陣容

受新冠肺炎影響,不少藝人冇工開,幸無綫繼續開劇,旗下藝人得以如常工作,不過Ali未有受惠,日前派口罩時透露《白2》將開拍,但未知會否有變數,心中仍存一絲希望有份拍,不過現已落實被飛出局!

馬國明受訪時坦言很想Ali「留底」:「當然最好原班陣容,呢個要睇番監製、編審決定。(會有新角色加入?)好正常,因為新古仔,有新血加入點都會畀到觀眾新鮮感。」而唐詩詠、張曦雯於第一輯與Ali是好朋友,詩詠亦稱最希望「齊人」拍攝:「我未收到通知幾時開始拍,所有嘅嘢要等正式開工先有答案。」至於張曦雯表示:「希望可以全部班底一齊拍,因為觀眾之前好鍾意我哋嘅關係,我哋私底下亦相處得好開心,希望一切順利,拍個好好睇嘅續集畀大家。」

唐詩詠唔驚返內地

《白2》劇組到內地的醫院取景,問馬國明擔不擔心有危險?他說:「我相信公司會就住疫情而決定,我希望10月拍得成,即係新冠肺炎已遠離大家,公司一定會喺安全下先出發。」而詩詠表示:「我唔會預先擔心未來幾個月嘅嘢,相信如果唔許可,公司都唔會叫我哋上去。我好信任我哋團隊,其次自己嘅個人衞生意識都要好強。」同劇的黃嘉樂亦稱不怕到內地開工:「呢套係醫療劇,我哋嘅準備好充足,就好似醫護人員咁,衞生各樣都會注意。」