李佳芯主演《殺手》計劃於炮灰檔期播出 套劇究竟講啲乜?

《殺手》

正所謂同人唔同命,黃心穎發生「安心事件」後,除咗主演嘅《牛下女高音》死過翻生之外,《丫鬟大聯盟》又即將播出。但係喺網上留言而惹是非嘅李佳芯(Ali),到而家都未有解凍嘅跡象。Ali連原班人馬開拍嘅《BB來了》續集都被換走,而佢主演嘅《殺手》都被抽起,但有傳《殺手》會喺新年檔期播出,套劇話晒都有兩大視帝黎耀祥及陳豪孭擔演,應該唔係差得去邊。不如劇透少少俾大家知!

黃心穎

黎耀祥喺劇中飾演過氣殺手閻武,而神級殺手喬星就由陳豪飾演,兩個人由共同對付敵人,之後變成要置對方於死地嘅敵人!

黎耀祥

《殺手》呢套劇嘅大部份演員都有份參演《跨世代》,好似江嘉敏。佢喺《跨世代》入面可愛又青春逼人,但喺《殺手》中佢就飾演一個殺手,而且佢仲係喬星嘅侄女,值得期待江嘉敏喺《殺手》入面嘅演出。

另外,喺《跨世代》入面陳豪同李佳芯飾演過一對情侶,而《殺手》就會延續佢兩個嘅情侶設定。咁李佳芯又會唔會好似江嘉敏咁,由可愛教主變成女殺手呢?只不過剛剛播出嘅預告片中,女主角李佳芯只有半秒出場。

李佳芯

早前有報道指麥明詩疑似淡出幕前做回老本行,的確有啲可惜!因為喺《殺手》入面,麥明詩飾演閻武個女,而且仲係一個失明人士。除咗好有發揮空間多之外,無綫今年眾多花旦出走,本身係一個上位嘅好機會,只不過人各有志!

麥明詩

其他角色方面,龔嘉欣同樣飾演殺手,更以「剷青頭」示人。江美儀又會以妓女姿態出現,後來更與閻武發生感情。仲有何遠東一直都係以搞笑形象出現,今次佢就會飾演一個同性戀者。

龔嘉欣
江美儀

咁多突破點,唔知會唔會比《跨世代》更爆呢?