朱晨麗身處內地 何廣沛代報平安:仲健在

何廣沛話朱晨麗一切安好!

藝人何廣沛與江嘉敏出席無綫劇集《大醬園》宣傳,近排武漢肺炎肆虐,內地確診人數不斷上升,但一眾藝人都冇戴口罩,而女主角朱晨麗此時更身在內地,未有現身宣傳。問到緋聞男友何廣沛可有關心對方?他說:「知道內地都好多相應措施,同埋都有停工,佢就一切安好,message佢有覆我,仲健在。(佢返嚟要隔離14日!)咁咪有排都見唔到囉!哎呀!宣傳唔到好大鑊喎!不過我唔知佢幾時返。(同佢傳不和嘅龔嘉欣都冇嚟宣傳!)佢兩個好忙嘛!主角忙係正常。」

冇去男友家拜年

與電競高層熱戀中的江嘉敏,被追問何時派雙封利是?她一臉甜笑表示:「咁快!拍咗一年幾,仲係熱戀期,依家係工作搏殺期,所以未有任何計劃住。(冇去男友屋企拜年?)冇呀,我連自己屋企都冇返去拜年,因為最近病菌好勁,屋企又缺口罩,所以唔想帶外來細菌返去。」

口罩唔夠使

早前花了3千元買口罩的她,被問到為何也不足夠使用?江嘉敏透露雖然已分了一半數量給雙親,但由於口罩平均一個售價已近40元,故實際總數量不算多。

搵替身拍咀戲

至於近日何廣沛與江嘉敏為新劇《食腦喪B》頻頻開工見面,稍後二人更要拍接吻戲,江嘉敏揚言欲使橫手叫助導延期拍,何廣沛聞言笑說:「有病菌一定要透過Kiss先傳染到咩?咁搵替身拍囉!」