朱晨麗現實版「滿月」喊住煲劇

東方日報
朱晨麗講到嫲嫲患癌,一度眼濕濕。

無綫台慶劇《兄弟》明晚首播,朱晨麗在活動上冧指晚晚有捧剛播畢、由緋聞男友何廣沛主演的《跳躍生命線》,自爆是陳瀅劇中角色「滿月」的現實版,她講到嫲嫲患癌,不禁雙眼通紅。

藝人王浩信、伍允龍、楊明、朱晨麗(朱朱)、江嘉敏及劉穎鏇等,昨日現身荃灣宣傳《兄弟》,劉穎鏇配合劇中角色身穿打拳裝束,大騷弗爆身材,惹來Fans尖叫!

席間眾人分組玩射槍及打拳遊戲,王浩信及江嘉敏埋身肉搏打拳全沒芥蒂,看來沒有受緋聞影響;朱朱更追住伍允龍大打出手,最後雙雙倒地,場面爆笑!

心痛嫲嫲患癌

朱朱笑言不怕新劇與《跳》劇有比較,希望承接該劇的好收視再創佳績,又信心爆棚預告《兄》劇首集就能吸引觀眾眼球。講到《跳》劇主角之一是緋聞男友何廣沛,她怕醜話有日日追看,最鍾意是羅蘭與陳瀅的「嫲孫情」,自爆正是真實版的「滿月」,同樣面對嫲嫲患癌,更一度講到眼濕濕:「嫲嫲都係同羅蘭姐差唔多大,所以一到嗰啲情節就喊到不得了,媽咪都喺隔籬睇,唔想睇得太投入就會去扮拖地,但心入面係好痛苦、好掙扎,希望佢順順利利,身體健康,佢依家住喺蘇州,都希望多啲返去陪佢傾偈。」

王浩信望食住個勢

主角三兄弟王浩信、楊明、伍允龍齊齊受訪,表示對新劇播出既緊張又期待。王浩信說:「始終係台慶劇,大家嘅關注度會提升,好睇就會加分,如果有瑕疵或會被放大,不過自己都睇咗成套劇好多次,覺得好順暢,希望觀眾飯後可以集中、抱住打機心情睇。」又指會配合劇中KOL角色,在社交平台分享劇情:「好似啲爆機序章、爆機攻略,畀大家重點欣賞。(《跳》劇成績咁好有壓力?)冇!都係想盡力做好戲畀觀眾,希望承接到好收視!」

伍允龍被朱晨麗追打,搞到瞓地!
王浩信與江嘉敏埋身肉搏,場面爆笑。
劉穎鏇拋胸打楊明,夠晒搶Fo!