朱晨麗下令禁伸脷洪永城尷尬面紅

東方日報
朱朱與洪永城於新劇合作,擦出不少搞笑火花。

藝人洪永城(Tony)和朱晨麗昨日到電台宣傳新劇,今次二人飾演夫妻,角色抵死又搶Fo,Tony劇透將有多場戲肉登場,朱朱即爆他大膽,拍咀戲時要向他下令「禁伸脷」。

無綫台慶劇《多功能老婆》剛推出,朱朱扮演Tony的「俏嬌妻」,二人經常打鬧鬥嘴,被不少人讚是「最佳拍檔」,他們笑說:「都未到戲肉,陸續有嚟!」並指稍後劇情二人會有更多衝突和矛盾,擦出火花,朱朱更說:「會令大家覺得呢個男人更抵打,我就更抵錫。」

她預告其中一幕是二人在車內咀嘴,朱朱笑說:「拍嗰時我擔心佢咀太耐,驚佢伸脷,怕佢情不自禁,你知佢幾大膽啦!所以拍之前我同監製陳寶華同佢商量,洪永城被下令要點到即止囉!咁場戲出嚟效果都幾好。」被爆出「禁伸脷」事件後,見慣大場面的Tony即場臉紅,並說:「冇乜澄清,呢啲叫怕愈描愈黑。」

自爆遭女友「家暴」

問到Tony拍親熱戲前可會向女友備案?他說不會刻意,反而會與對手溝通清楚。至於播咀戲時可會叫女友捧場?他指女友有看劇,在旁的朱朱即笑問:「你女友會唔會好憎我?我成日咁打你、糟質你?」他竟說女友沒有嬲,反而有樣學樣:「佢有抄朱朱啲技巧,話呢招好,學習點樣糟質我、打我、虐待我,反而話要多謝你!」