未婚夫大方任睇可宜肉感試婚紗

東方日報
可宜

ViuTV中英混血主持可宜,早前答應下嫁拍拖8年、有「港版流川楓」之稱的「甲一籃神」鄭錦興,並定於本年底結婚。離大日子尚有半年,二人日前行孖咇落舖試婚紗,堪稱半個鬼妹仔的可宜,換上多套性感婚紗大騷身材,而「準人夫」亦毫不介意,心心眼望實女友,笑到四萬咁口,又幫忙整理裙襬兼為她影靚相。情到濃時,兩口子更無視店員,突然來個深情一吻,閃爆全場!

忍口Share雪條

由於婚禮開支龐大,二人慳得一蚊得一蚊,試完婚紗後拖手行廟街,不但齋睇冇斬獲,更一條雪條兩份食,留錢日後「上車」做業主。

可宜昨日接受本報電話訪問,問到婚禮籌備情況,她說:「要Book嘅嘢都已經Book晒,所以嗰日趁有時間同未婚夫試婚紗,順手叫佢畀吓意見。(一條雪條兩份食喎!)係呀!因為我要減肥,但當日又好熱,所以同佢Share。(咁慳想做業主?)都物色緊,等樓價跌先入手。」

試了多套婚紗的可宜,突然與未婚夫Kiss放閃。
雪條兩份食,唔怕肥又慳到錢,一舉兩得。
可宜咁索,難怪未婚夫笑得咁開心。