【有無睇?】《救妻同學會》播咗一集就有網民話要棄劇 究竟套劇衰啲咩?

無綫愛情青春劇《救妻同學會》喺啱啱過咗嘅星期日(25)首播,劇集搵咗胡鴻鈞同劉佩玥擔正加上一班新生代演員主演。無綫都有一段時間冇拍青春劇,所以唔少觀眾都認為幾有新鮮感同埋覺得好期待,可惜劇集出街後,大部分網民嘅反應都係負評,有人更加話要棄劇。究竟劇集衰啲咩?即刻同大家分析一下啦!

青春劇陣容唔青春

劇集以青春活力作賣點,搵咗一班新生代演員演出,但係呢班新演員絕大部分都係80後,女主角劉佩玥今年已經29歲,男主角胡鴻鈞就28歲。其他演員都係咁上下,好似黃美棋29歲、劉溫馨28歲、黃庭鋒30歲、簡淑兒29歲,而年紀最大嘅朱智賢就已經32歲,平均年齡接近30歲。唔少網民都話選角年紀太大,點解唔搵啲後生少少,例如馮盈盈、鄺潔楹、《愛·回家之開心速遞》飾演金城安及朱凌凌嘅周嘉洛同埋吳偉豪。

主演演員年齡:
朱智賢(32歲)飾演唐美蘭
譚永浩(31歲)飾演徐嘉偉
黃庭鋒(30歲)飾演張梓健
劉佩玥(29歲)飾演趙卓穎
黃美棋(29歲)飾演丁嘉敏
李任燊(29歲)飾演羅諾信
簡淑兒(29歲)飾演余鳳婉
胡鴻鈞(28歲)飾演李恩朗
劉溫馨(28歲)飾演胡彩芝
蔚雨芯(25歲)飾演方少娜
伍富橋(24歲)飾演梁曉揚 Sun

睇完唔知睇緊咩

劇情主要講述李恩朗(胡鴻鈞飾)喺商場買完聖誕禮物後被擄走,醒返發現老婆(劉佩玥飾)都同樣被黑道擄走。之後仲話恩朗侵吞咗佢哋一億元,命令佢喺72小時之內交還,如果唔係就殺死佢老婆。之後恩朗去咗報警,但係阿Sun(伍富橋飾)以為佢係殺人兇手將佢扣留,期間恩朗情緒崩潰暈低咗,喺送院途中救護車被賊人攔截,之後恩朗逃走,成為通緝犯。喺逃亡期間,佢回憶宿舍往事,仲發現關鍵線索,就係真兇可能係宿舍嘅宿友。

但係無綫今次嘅拍攝手法同平時劇集唔同,今次係加入平行時空元素,一時講現在,一時講過去。嗰頭講緊宿舍hall雞,轉個頭又跳返去救老婆,唔少網民都認為跳得太快,搞到好亂,睇完成集都唔知睇緊咩。

伍富橋演技十級幼嫩

今次無綫搵咗伍富橋接替余德丞拍攝《救妻同學會》,佢嘅演技似乎得唔到網民嘅認同。雖然佢係第一次拍劇,但係唔少網民覺得佢一啲眼神交流都冇、過於生硬

色調睇到好辛苦

只要係講到宿舍嘅時候,成個畫面嘅色調都會變得好奇怪,畫面偏光,唔少網民都話睇得好唔舒服同難頂,有網民仲搞笑問係唔係想用色調去遮住演員嘅皺紋。

其實網民都唔係一面倒彈嘅,佢哋都有讚朱智賢同黃庭鋒㗎!唔少網民大讚朱智賢有樣有演技,睇劇都係為咗睇佢,仲話佢演技自然、可以孭飛及比劉佩玥更似女一等等。另外,亦有網民大讚黃庭鋒外型靚仔及第一次拍劇演技不俗。