「月老」啤梨等好友婚期自薦反串做姊妹

東方日報
啤梨(左)戥將結婚的彭懷安開心!

新城DJ葉文輝(啤梨)被指是撮合好友彭懷安(Eddie)和未婚妻的「月老」,昨日啤梨受訪時說:「都唔算係,不過佢哋係參加我嘅喜宴而認識啫!其實我同個女仔都熟,佢係我太太嘅閨蜜,我哋私下有約埋玩,都知佢哋拍拖,因為佢哋有同我哋班朋友講,仲估到佢哋打算結婚,不過就未同我講佢哋入咗紙結婚。」

見Eddie將成家,啤梨真心戥好友高興,並笑說:「見到朋友終於定落嚟嘛!佢哋好合襯,我等緊佢哋婚期,要我做兄弟或反串做姊妹都冇問題,隨時候命。」問到他與Eddie前度朱慧敏亦是好友,可覺得身份變得尷尬?啤梨說:「朱慧敏係個好女仔,又靚、條件又好,相信佢好快識到個好男仔。」

彭懷安與Ivy在啤梨的婚宴擔任兄弟及姊妹而認識。