月曆暗藏玄機 邊個係無綫下年力捧對象?

無綫噚日公佈咗2018年月曆,一如既往月曆主題當然以劇集為主,將部分重頭劇嘅劇照收集在內。當中包括有《大帥哥》、《果欄中的江湖大嫂》、《再創世紀》、《是咁的,法官閣下》、《兄弟》、《包青天再起風雲》、《逆緣》等等。

單睇呢個月曆就已經睇得出下年會力捧邊個藝員,首先當然就係有各孭兩套重頭劇楊明、譚俊彥(即狄龍個仔)同陳山聰啦!反而視帝陳展鵬、黎耀祥、郭晉安等每人就只係得一套劇,而收視福將陳豪同歐陽震華就人影都唔見。至於女藝員方面,只要望下幅大合照就知道翠如BB、胡定欣、姚子羚、黃智雯、陳凱琳等,分佈尚算平均。

月曆一出有網民就將佢同以前嘅月曆比較:「都係比較鍾意以前的月曆,又唔同主題同組合,而家用劇集做,變咗只係多咗款海報,且有些演員如有多套戲,又會重覆,有些無戲上,又未必有得影,唔係咁平均」、「個樣咁膠,好似遂個遂個P上圖」。

不過最多網民關注嘅當然就係各位藝員嚟緊呢年嘅走勢啦!今次最搶眼嘅一定係呢位喺香港冇咩人識,不過2018年又將會被無綫力捧嘅譚俊彥。好多網民見到佢佔咗月曆咁多版面就似乎戥其他藝員唔抵留言話:「一個譚俊彥已霸佔了2個月份,觀眾都沒真正認識你係乜水,咁快就做2大劇的男主,其他小生呢? 其他小生明年有劇上月曆相點解冇份影? 後台好勁好勁」、「經已坐上視帝位置嘅還ok,其他小生就……又要慢慢爬,鬼叫自己老竇唔係狄龍咩」、「點解譚俊彥要大頭過視帝視后?」。另外大家似乎亦對下年嘅卡士有啲擔心:「咁多新一代港姐、小花 真係不妙」、「男一啦,睇個頭大小同左右都知。煎pang做視帝未够一年就要燉冬菇做男二,慘慘」、「少了DODO,邵美琪和宣萱」等等

不過當然亦有無綫大台死忠粉絲覺得下年嘅劇集好值得期待:「我想我想我想我想我想我想要無綫電視月曆」、「下年有好多部新劇我睇電視預告片時都覺得大部份睇落好似都幾好睇敢樣,所以令到我相當期待。」、「我有看 Hubert胡鴻鈞相影得好睇好靚仔呀」等等