曾樂彤惹火用盡衝動Quota

東方日報
曾樂彤坦言現時學懂慎言,會冷靜處理突發事情。

英皇小花曾樂彤推出鼓勵式「情歌」,大爆對舊愛的「遺物」難離難捨。性格爽直的她自認夠晒「惹火」,經常闖禍搞到爆Quota,笑言被公司「放棄」!

轉戰樂壇兩年多的曾樂彤密密出歌,日前推出《找到一個人》,勉勵單身人士總能「出Pool」。雖然人靚聲甜,但她笑言拍拖唔夠Sweet,永遠理性行先:「唔係好理節日,要慶祝都會前後一星期食餐好,最緊要人到。我唔係愛情至上嘅人,做好工作先娛樂,會當伴侶係最好嘅朋友。(食住男友?)唔會,呢個關係好攰,我好快會抽身。」

初出道便橫掃多個新人獎的她,事業正穩步上揚,卻殺出新冠肺炎「程咬金」。雖然工作受阻,卻慶幸此刻仍能出歌,可以做老本行在網上平台宣傳:「現今世代拍片擺上網好方便,覺得做音樂冇乜衝突。」又抵死自嘲是一個奇特的存在:「同事話我好『惹火』,但唔係講身材,係個人特點好惹火!拍旅行片、做訪問都一定有一句引起大家討論,其實都幾開心,個人跳Tone又活潑!」

學識慎言:我係叻女嚟

「咪嘴事件」發生一周年,她坦言有從錯誤中學習:「可能我以前真係One Man Band,所有嘢都掌握晒,但做幕前、喺你未知情下,唔係所有嘢都可以控制到,背後亦唔淨係得我一個。依家學識慎言,唔會再咁衝動、自私,人生已經用盡啲衝動Quota,要發洩都對住啲最Close嘅朋友。」變得壓抑自己?她大笑說:「壓抑唔到o架!總有一、兩句漏出嚟,公司同事都冇晒我辦法,總知唔好出大事就OK,依家會小心,我係一個叻女嚟!」

難忘初戀「遺物」

有行動力、上進心、善良與相若價值觀是樂彤的擇偶條件,她自爆最難忘收到初戀男友親製布袋及木製簿:「分咗手之後都有Keep起份禮物,諗佢今生都唔會咁有心機再整畀另一個女仔。(現任知道唔介意?)冇特別講起,前度都會送啲好實際嘅嘢,用得到都會繼續用。」

曾樂彤自言不是愛情至上的人,會以工作為先。