暪出道前已結婚 吳尊大話精被喪插欺騙粉絲

暪出道前已結婚 吳尊大話精被喪插欺騙粉絲

40歲藝人吳尊在2005年以組合「飛輪海」出道,當時飛輪海四子力Sell Young爆青春偶像唱跳路線,連個「飛輪海頭」都成為潮流,就知佢哋幾成功!依家吳尊轉型做好爸爸,2013年突然透露已婚兼女都有埋,老婆林麗吟嘅身份先正式曝光,男神變人夫已經傷透心,點知近日二人齊齊上節目,大方公開埋結婚證書,竟自揭一路講大話,原來二人早於2004年已成婚,粉絲畀佢呃足15年!

吳尊與林麗吟夫妻檔參加大陸真人騷《婚前21天》,林麗吟大方現身,即被讚靚樣無敵,兩人仲公開2004年12月2日註冊嘅結婚證書,計落二人已结婚15年,吳尊續表示心中有一個遺憾,就係當年未有辦婚禮,希望今次可以促成此事。

粉絲見到即刻打咗個突,因此佢哋間接承認吳尊喺2005年出道前已婚,佢本人仲要「親證」過結婚時間係2009年,旋即引發網民議論,唔少網民就直插佢未出道就結婚,期間更係多次表示單身,簡直就係欺騙粉絲感情,更加係偶像失格!

吳尊2013年10月公開已婚以及有女兒時,曾在記者會鞠躬道歉,當時佢自稱係2009年底結婚,女兒Neinei於2010年出世,而細仔Max就於2013年出世。