《是咁的,法官閣下》黎振燁演技獲網民讚賞有望上位

黎振燁(Jackson)係2016年香港先生冠軍,當時嘅佢可以話係大熱姿態嬴出。不過大家又知唔知其實佢唔係香港先生而入行,Jackson喺09年已經成為無綫電視第23期藝員訓練班學員,加入無綫前佢係一位高薪厚職嘅時裝設計師,亦因為想演戲,所以決定放棄職位投身娛樂圈。

而喺參選香港先生之前,大多都係做閒角,發揮機會可以話係冇,自然知名度都會相對減低。喺無綫演藝事業發展較為坎坷,所以後期更加入香港電視。隨後因為港視冇發展,所以佢都冇續約。

獲選香港先生冠軍之後,Jackson演出機會比從前更多,演出角色都可以話已經唔再係閒角。《飛虎之潛行極戰》中飾演警察部電腦天才嘅鄭世豪都唔再係可有可無,佢嘅演出甚至令人知道他係好戲之人。《愛·回家之開心速遞》中飾演介入大小姐(林淑敏飾)與送水輝(許家傑飾)感情,單戀惡死大小姐嘅Jacky,當大小姐大叫「Shut up!Shut up!」嘅時候就會諗起自己阿媽,連大小姐都冇佢符,場面抵死搞笑。而喺啱啱播完嘅《再創世紀》中嘅熱血工頭傅建業為周勵淇工作,一個熱血嘅工頭,喺劇中表現沉穩,自然獲得唔少網民讚賞,可以話眼神都可以做到戲,唔怪得網民都開始識得欣賞佢!上星期開始出街嘅《是咁的,法官閣下》都係今年台慶劇之一,Jackson都有份參與,飾演一位大律師Archie,仲同林秀怡飾演嘅大律師Faye有感情線。

Jackson放棄高薪厚職,做一份唔穩定嘅工,入行8年期間有喜有跌。但佢喺《再創世紀》大獲認同。希望佢能遇到更多好劇本,演出更多好角色,完成佢嘅演員夢。大家又係唔係越嚟越欣賞佢呢?