明珠台自家製粵語配音將成歷史 網民:好失望

TVB

無綫近年不停削減人手,上年12月,行政總裁李寶安發出內部通告,全公司要裁減10%非藝人員工,即係有大約350人受影響。除咗呢10%員工外,仲有部份員工不獲續約而離開無綫。而配音組亦要減省人手開支,無綫決定取消明珠台雙語廣播粵語配音,即係明珠台播出嘅劇集及電影等等都淨係得英文,唔會再提供粵語配音選擇。有配音員工指所有首播嘅美劇已經冇再配,而家只係配埋之前未完嗰啲。即係現時配音組仲配緊嘅美劇有《好醫生》(The Good Doctor)及《神探猛龍》(Magnum, P.I.)。

錄音廠開工愈來愈少,今年1月1日開始,由5個廠變3個。有員工都話預左,因為ViuTVsix冇配音一樣運作正常,估到無綫都會行呢一步。而家無綫財經 ▪ 資訊台嘅外購節目都轉俾新聞及資訊部記者,或者外判俾配音公司做。傳媒向無綫查詢時,無綫以電郵回覆指傳聞屬實。

唔少網民喺網上討論及留言:「步向ATV的後塵」、「越做越縮」、「無綫配音人員一向出色」及「唉…好失望」等等。