【早霸王】男聽眾激嬲惡死女友 森美:女士教訓男友要有個限度

【早霸王】男聽眾激嬲惡死女友 森美:女士教訓男友要有個限度

男聽眾阿豪因為同女性朋友A小姐深夜WhatsApp而激嬲女友,於是希望藉《早霸王》嘅「你知唔知道有人掛住你」環節同女友道歉,身為愛情專家嘅森美不停向阿豪提供「屎橋」,最後仲竟然叫阿豪向A小姐表白……

對於同女性友人於晚間時份WhatsApp,男聽眾阿豪堅稱與對方「無嘢」,但森美就一口咬定呢條已經係死罪,追問阿豪到底係幾點同對方WhatsApp,佢就支吾以對,最後終於話係晚上12點後,並解釋係因為自己夜瞓:「女朋友嬲我鏟曬啲訊息」,如果無嘢的話,又點會刪除對話內容呢?阿豪表示:「因為我驚囉,因為佢(女友)好惡」 對於刪除訊息呢個舉動,森美表示自己都係過來人,並笑言「但你永遠都唔知點解會無瑞瑞會刪漏一個而被發現,你女朋友惡又咁緊張,係因為佢無信心,唔係對唔住就可以搞得到。」森美提議阿豪喺女友面前傳訊息俾A小姐,大鬧對方一頓,並舉例加以說明之「你不知所謂,八婆我對你無嘢……」阿豪話可以咁做,但認為言論上唔使去到咁盡。

由於女友完全對阿豪不揪不睬,甚至封鎖其WhatsApp,阿豪無計可施又想表現自己有心改過,所以先會求助森美。但森美認為成件事唔樂觀,結果阿豪女友真係無接電話,而係呢個時候,Marco竟然爆出一句:「不同轉打俾A小姐表白啦」森美即時助攻:「反正都係無,點解唔試?」阿豪就話:「咁真係普通朋友嘛」森美唔死心,繼續做說客:「所有女士如果你要教訓男朋友都要有個限度,因為呢個情況係會發生,就係個男仔係會走,一個拍咁耐拖,又煩又黑面,一個新鮮識嘅,開心又快樂,如果你打算用鞭策方法令對方回心轉意,冇可能啦。」講完一大輪,森美再叫阿豪向A小姐表白,但佢就十分無奈咁話:「你唔好成日叫我搵A小姐啦,我唔會啦真係。」仲表示自己已經無同A小姐聯絡,因為要喺呢啲敏感時期要搞返掂啲正經嘢先……

點擊瀏覽《香港01》更多內容和圖集

你可能感興趣:
【早霸王】男聽眾承諾改壞習慣惜太遲 森美:男人只會變本加厲
【早霸王】男聽眾為心儀對象親自下廚 森美:我唔信你無食埋糖水