【新片疑用AI換臉】范冰冰38歲生日冇人理?

范冰冰今日38歲生日!

大陸女星范冰冰今日38歲生日,過去一年先後經歷逃稅風波及與李晨分手,事業及愛情都受盡打擊!生日嘅今天,佢選擇「改頭換面」,將微博頭像換成卡通畫像,不過另一重點係竟然圈中冇咩人向佢送上生日祝福!

以往一踏入凌晨12點,就有唔少圈中好友排隊留言畀佢,好似Angelababy、陳學冬、小沈陽咁,但今年較為出名嘅竟然得張鈞甯留言:「生日大快樂!🎁🎈🎉🎂🎉祝福你永遠平安、健康,開開心心![心]」而以往「范冰冰生日」必上熱搜嘅情況已不復見,不過仲有一啲忠心耿耿嘅粉絲團依然祝福偶像生日快樂!

此外,雖然冰冰工作受影響,但其「復出作」荷里活電影《355》未被易角,7月時官方更發放幕後花絮,冰冰積極操拳備戰,但有傳因為被限制出境而遲遲未入劇組拍攝!最近,網上就流傳國外拍攝現場嘅最新照片,出現咗有疑似范冰冰嘅替身,進行「AI換臉」嘅鏡頭。

呢名替身名叫鹿寧,來自大陸,身兼演員、舞蹈員及模特兒,從2018年起已參與十幾部影視作品及廣告拍攝,身形同冰冰甚為相似!而喺7月時,佢就曾喺社交網分享喺法國影嘅相,相信當時正在當地拍攝《355》。