新冠肺炎搶廁紙潮 楊卓娜疑係幕後推手?

網上日前流傳疑似楊卓娜嘅錄音叫大家買廁紙,有指係搶廁紙潮其中一個源頭

新冠肺炎疫情嚴峻,除咗口罩賣斷市,早幾日仲因為有傳廁紙可能短缺而出現搶廁紙潮,不過超市同供應商好快就澄清咗廁紙跟紙巾供應量穩定,叫市民無須恐慌。咁到底廁紙供應告急嘅消息係喺邊度傳出?網上流傳疑似藝人楊卓娜嘅錄音,內容係咁嘅,佢話:「我哋頭先去買紙巾,因為我老公個客話我哋知,佢哋係做運輸嘅,佢哋話個物流可能有啲停滯,因為封關,咁短期內呢冇紙巾,尤其是卷裝紙巾,咁你哋考慮吓自己使唔使買少少啦,如果冇嘅真係要買少少,咁又唔使好恐慌嘅。」雖然話唔使恐慌,但呢把疑似楊卓娜嘅聲其後又大爆原來有啲品牌嘅紙巾廠喺武漢,因為生產唔到所以供應就會有問題,叫大家考慮自己有冇存貨,最後都係強調唔需要恐慌。

分享抗疫方法

有指呢段錄音喺搶廁紙潮前兩日已經有,消息人傳人嘅速度可謂快過疫症,所以唔少人都信以為真去盲搶紙巾,仲話分分鐘呢段錄音係其中一個源頭令大家走晒去撲紙。其實楊卓娜一向好關心疫情,近日就不斷發文同大家分享點樣抗疫,除咗教整口罩套之外,仲呼籲大家如果有鬆動就帶多兩個口罩喺身,分享畀有需要嘅路人。相信如果把聲嘅主人真係楊卓娜嘅話,佢都係因為收到消息太心急提醒身邊人,所以先未嚟得切Fact check喇!

只係好心講一句

東網聯絡楊卓娜,佢直認聲帶係佢本人,佢解釋無意引起恐慌或搶廁紙潮:「我係出於好心,叫自己嘅朋友有需要買少少,好casual一句說話就畀人攞咗嚟炒作。(怕唔怕話你引起恐慌?)我自己都冇恐慌,唔會引起恐慌,我冇任何負面訊息喺入面,我習慣用到冇晒廁紙先買,擔心其他人會好似我咁。其實唔係我引起恐慌,係我去超級市場嘅時候見到啲廁紙畀人掃晒,所以喺群組入面講一句,如果有需要就買啲,我自己都只係買咗三條,因為有六個大人同兩隻狗,我只係提吓家人同身邊朋友,有需要就買,唔好用到真係冇晒先去買。」