斥欠同理心 撐有權唔鍾意

東方日報

鍾晴的「憎狗論」惹起圈中不少藝人回應,其中惹來愛狗之人指摘,但亦有明白其感受的過來人予以力撐。

姚子羚:我知道每個人都有自己感受,亦唔係每個人都喜歡狗,但希望能將心比己!如果有得揀,佢哋都唔會想住喺工廠區又成身唔乾淨,都想有個家、有人愛!作為藝人,我覺得應該傳遞多啲正面嘅訊息!

陳彥行:如果佢細個畀狗追、咬嘅經歷係真嘅話,我會選擇體諒佢,但唔代表佢可以用厭惡、嫌棄嘅態度去對待流浪狗,有頭髮邊個想做癩痢?希望佢經一事長一智,做一個有美貌仲係有愛心同智慧嘅女藝人!

邵子風:作為一個養狗並愛狗嘅人士,真心覺得冇問題,只係覺得佢講得蠢……等同於一個唔鍾意食榴槤嘅人講出佢討厭榴槤嘅原因,只係個人喜好,同佢有冇愛心,完全冇關係……點解大家唔能夠接受呢個世界係有人唔鍾意狗呢?

曾鬧出「棄養」風波的陳柏宇:我覺得唔係個個都一定要鍾意狗,唔需要太過攻擊佢,每個人都有權去講自己意見,佢只係發表唔喜歡嗰類型嘅狗,唔係因為唔鍾意而去傷害或者去踢佢一腳,我覺得冇得咁話人。