文雪兒驚爆曾患乳癌 工程師大女宣布進軍娛圈

文雪兒首次公開曾患上乳癌!

近年重返幕前拍劇嘅文雪兒與前夫離婚後,獨力照顧兩個女兒,近日佢接受訪問時,除咗大談辛酸史外,更首次自揭曾患上乳癌!

文雪兒同前夫育有兩個女!

當時嘅佢正值創業階段,美甲生意剛剛起步,令佢壓力好大,大家都話佢面色唔好,所以佢就去睇醫生,最後發現患上零至一期乳癌,係好初期,雖然係咁,但佢都唔想當時只有12歲嘅大女張筠(Christy)擔心,臨做手術前一晚先同阿女講,佢更形容似「交低身後事」,最後成功戰勝癌魔令佢好感恩!

佢患病時,大女Christy得12歲…

而當年仲係單親媽媽嘅文雪兒更自爆供愛女讀書使咗唔少錢,補習數學2年使60幾萬,供阿女去外國讀書4年總共200百萬!不過正所謂「坎坷過後有艇搭」,文雪兒兩個女非常生性,Christy畢業於UCL(倫敦大學學院)土木工程系碩士課程畢業,現職土木工程師,細女Jennifier亦完成傳理系課程,依家幫媽咪打理美甲店生意!

Christy讀書時曾代表香港到美國參加閃避球比賽!
如今已經係土木工程師!
咁靚嘅工程師你見過未?

身為「學霸」嘅Christy,未有繼承繼父建築師職業,選擇進軍娛圈!不過其實佢起初冇打算入行,係被Model公司Quest Artists & Models睇中,覺得佢似韓劇《夫妻的世界》中嘅韓素希,雙方一拍即合!雖然決定加入娛圈,但佢會考工程師牌,完成媽咪心願!而文雪兒就澄清唔係「虎媽」,唔想阿女咁大壓力,自己條路自己揀,再睇吓日後有冇興趣拍劇!

闖娛圈發展!
不過都唔會辜負媽咪心願!
讀書叻、樣又靚、身材好!
難怪被Model公司睇中!

文雪兒接受東網訪問時就透露:「佢細個都好鍾意扮Model,着靚衫行Catwalk,如今有機會畀佢着靚衫,騷吓努力煉返嚟嘅身形,只要佢開心,同埋形象健康我都會贊成!」講到佢患癌時,佢表示發生喺14年前,坦言雖然係初期,唔算大手術,但心情好沉重:「諗嘢比較負面,有啲人入咗手術室出唔返嚟…我都有恐懼、驚惶失措,幸好身邊好多人支持我,呢關唔算太難過!」而因為係初期癌症,不須割除乳房。

野性一面又得!
展現成熟美!
仲有甜美一面!
如今一家四口夠晒幸福!