文雪兒守得雲開工程師大女殺入行

東方日報
文雪兒花盡心血培育兩女,大女做工程師,細女(右)則幫手打理生意。

近年重返幕前拍劇的文雪兒,未下嫁第二任建築師丈夫前,獨力照顧與前夫所生的兩個女兒,其後更不幸患上乳癌!坎坷過後,女兒們亭亭玉立,其中大女Christy被睇中邀入行,繼承母親衣鉢。

70、80年代麗的電視當家花旦文雪兒,如今雖踏入60歲,但一樣美艷如昔。有過兩段婚姻的她,與前夫育有兩女,當年經歷人生高低起跌,不再幕前演出後決定創業做美甲生意,但事業剛起步之際,病魔卻來襲!她憶述14年前,有朋友指其面色欠佳,求醫後才發現患上早期乳癌,由於不想當時只有12歲的大女張筠(Christy)擔心,臨做手術前一晚才跟女兒講,更形容似「交低身後事」,幸好最後戰勝癌魔,大為感恩!

單親媽媽不易做,文雪兒堅強地湊大女兒,還自爆為供愛女讀書而花費不少,單單補習數學兩年已花60多萬,供女兒到外國讀書四年更要200萬!「坎坷過後有艇搭」,兩位女兒非常生性,Christy畢業於UCL(倫敦大學學院)土木工程系碩士課程,現職土木工程師;細女Jennifer則完成傳理系課程,現正幫她打理美甲店生意!

激似韓星被睇中 一拍即合

身為「學霸」的Christy,未有繼承繼父建築師職業,選擇進軍娛圈!原本她沒打算入行,及後被模特兒公司睇中,覺得她似韓劇《夫妻的世界》中的韓素希,雙方一拍即合!雖然決定做明星,但Christy仍會考工程師牌,圓媽咪心願。

文雪兒昨日接受訪問時透露,女兒小時候愛扮Model,着靚衫行Catwalk:「依家有機會畀佢着靚衫,騷吓努力練番嚟嘅身形,只要佢開心同埋形象健康,我都會贊成!」講到患癌的日子,她坦言雖然是初期,亦不算是大手術,但當時心情卻很沉重:「我諗嘢比較負面,有啲人入咗手術室出唔番嚟……所以都有恐懼、驚惶失措,幸好身邊好多人支持我,呢關唔算太難過!」由於屬於早期癌症,不用切除乳房。

Christy貌似韓星韓素希,結果被模特兒公司睇中簽入行。
網晒水着照,身形Fit到爆!
Christy戴起安全帽到工地視察,不讓鬚眉!