搣甩花瓶形象 楊秀惠捱出頭拍劇兼開埋舖頭

張衛健(Dicky)主演嘅無綫劇集《大帥哥》無論係故事內容定演員表現都得到觀眾讚賞,除咗張衛健嘅精湛演技之外,連同佢有對手戲嘅小生花旦嘅演技都備受讚賞。劇中飾演艾妞嘅楊秀惠,演技大爆發,獲網民好評兼搣甩「花瓶」形象。唔講唔知之所以艾妞一角做得咁好,因為之前楊秀惠經歷過唔少辛酸事。

楊秀惠喺20歲由馬來西亞離鄉別井嚟香港參加《2004年國際華裔小姐》五強止步,之後簽約無綫成為旗下藝人,拍攝多部劇集,例如《赤沙印記@四葉草.2》、《仁心解碼》、《萬凰之王》及《當旺爸爸》等等,不過一直都半紅不黑,直至《鬼同你OT》中「羅麗花」一角先開始廣受歡迎。

楊秀惠之前講過嚟香港頭七年,都係靠爸爸經濟資助,幫手交屋租,自己無錢又唔敢同屋企人講,每個月得千零蚊做飯錢,所以佢三餐縮為一餐。佢有段時間去勉勵自己,喺日記每一頁都係咁寫:「楊秀惠,你要頂住,信自己可以捱過,唔再晚晚失控咁喊。」、「唔緊要,你咁肥,依家食一餐可以減到肥。」、「你得嘅,你會捱過,終有一日你唔再晚晚喊。」等等。佢好感激當時有周家蔚成日搵藉口請佢食飯,佢先可以捱過。

直到27歲嗰年,楊秀惠問爸爸借咗六位數字做護膚品代理,佢唔想輸咗爸爸嘅錢,嗰時一邊拍劇一邊返鋪頭,面對好多問題。有時佢攰到喺鋪頭訓覺,第二朝繼續做。捱咗頭一年只夠交租同出糧俾佢嘅一位員工,但佢無諗過放棄仲繼續努力去做。34歲嘅楊秀惠已經有自己嘅事業王國,喺香港、星馬、澳門都有分店,甚至網店。佢除咗拍劇,仲將生意做得有聲有色,一個女人仔養起三十幾個員工,佢嘅辛苦總算有回報。