揭患腦膜炎經過 韓馬利病後反應慢抑鬱

韓馬利精神唔錯。

由蘇志威(蘇老闆)創立的舞蹈演藝學院,今日舉行記者會宣傳最新舞蹈證書課程,擔任學院董事、早前自爆患腦膜炎的韓馬利(Mary)首次公開現身,回復狀態、精神不俗的她大派定心丸指身體好好多。

講到病發經過,Mary表示突然發燒2日,被老公捉去睇醫生,繼而「斷片」陷入昏迷,曾一度危險到猶如半隻腳踩入鬼門關:「以為食退燒藥就得,一去睇醫生就叫我即刻入院,佢一講完就斷片好模糊,直接入院不省人事,又唔係發高燒,估唔到有咁大反應。」並指昏迷了個幾星期全無意識:「有朋友話我醒得番好好彩,有人幾乎手腳都唔郁得、有人3個月都醒唔番,真係唔好睇少發燒。」

中西合璧治療

問到是否嚇壞老公?她笑言:「嚇死佢啦!結婚30幾年都冇見過佢咁驚、咁緊張、咁細心,好彩自己有做開運動,冇抵抗力情況會更差。」正接受中西合璧治療,要食半年血清素:「吊咗3個星期消炎藥,搞到散晒冇力、出晒冷汗,後期仲有抑鬱,所以要食血清素,因為驚翻發,中醫就係調理。」

大病後情緒低落

Mary又指大病過後發現反應變慢,有時見到人都講唔出名字,體重方面亦大跌7kg,現成功增肥5kg:「瞓到食到就已經好好,當時食唔到好無奈、好辛苦、好慘,朋友又幫唔到自己,叫我諗啲開心嘢,但情緒低落係控制唔到,經過今次病之後,都有諗餘下生命點過,以前太忙,依家好享受慢活生活,覺得每日擘大到眼唔係必然,食到嘢、抖到氣都好感恩,學會關心多啲長期病患者,安慰無奈、無助嘅佢哋,首先要裝備好自己先。」

蘇老闆唔敢自己開課程

講回最新舞蹈課程,剛從馬來西亞開草蜢巡迴演唱會的蘇老闆話:「唔敢自己開課程,飛來飛去做嘢,下星期就飛去美國開騷,今次呢個課程係獲國際認可,仲可以申請政府資助。簽到獨家都覺得好光榮,為舞蹈界出一分力,可以幫助到年青人,推動到做運動、享受音樂樂趣,增進佢哋知識、引起興趣,睇吓會唔會加入呢行。」