捲入#metoo漩渦 Woody Allen 新作美國上映無期

香港觀眾對Woody Allen一定唔會陌生,大導演年屆84歲,仍然保持到穩定產量,年年有一套咁滯,舊作Mahattan、05年《迷失決勝分》到以「情迷」做片名嘅《情迷午夜巴黎》、《情迷巴塞隆拿》到上年《奇幻摩天輪》,未至有過千萬票房,但有一定捧場客。點解新作A Rainy Day in New York會上映無期?

Woody Allen本身私生活都有唔少新聞,養女宋儀由父女變夫妻,同前妻Mia Farrow離婚後關係惡劣以至同班仔女都關係麻麻;上年#Metoo運動,佢個女Dylan Farrow控訴童年受Woody Allen性侵,導演多次出嚟澄清指控不實,堅持自己無做過,件事成為羅生門。真實情況係點得當事人先知,不過夠哂負面,令投資者卻步。

銳意發展影片平台嘅電商巨擘Amazon本來同Woody Allen簽咗4部片約,投資額達6800萬美金,前期訂金都俾埋,本來對於導演性侵醜聞已經唔多高興但未至於解約。可惜,老人家自己點著咗條導火線,宣傳《奇幻摩天輪》接受訪問,被問到對於#Metoo運動有咩見解時,老人家話自己應該做被聲討一方嘅代言人,立即引起公關災難!

結果,有唔少星好似Colin Flirth、Ellen Page就表明唔會再同導演合作,而其他名人好似Natalie Portman、Reese Witherspoon就表示相信Dylan Farrow嘅指控。基於無數負面新聞同輿論壓力下,無咩大星敢接Woody Allen嘅戲,就係咁,金主Amazon決定終止同Woody Allen嘅合作,所有project 宣布on hold,包括已完成拍攝嘅A Rainy Day in New York。

A Rainy Day in New York由一班人氣年輕演員包括《以你的名字呼喚我》嘅「甜茶」Timothee Chalamet、Elle Fanning、樂壇小天后Selena Gomez、Jude Law同Suki Waterhouse。故事講述一對年輕情侶初次到紐約,因為天雨關係未能按原定計劃出遊,因此各自遇上各種奇人奇事。

受性侵醜聞影響,有關套戲嘅宣傳都變哂負評,電影於美國上映無期,片中一眾主角將片酬捐哂俾#Metoo運動機構以表立場!

美國資金凍過水,導演唯有轉戰歐洲市場。以後想睇Woody Allen新作?未必咁容易!