捱足13年終上位 「嚴謹」張達倫升呢做主角

入行13年喺無綫大多數做配角嘅張達倫,呢兩年似乎好旺佢。自從佢喺《愛.回家》飾演「嚴謹」一角獲得一班觀眾同網民留意,啱啱10月又同太太生咗「勁秋雞」,一索得男,仲不時喺社交網站大晒溫馨合照。

家庭和諧之餘,事業亦非常得意。因為喺無綫捱足13年嘅佢今年喺劇集《不懂撒嬌的女人》中飾演Oscar暗戀譚凱琪飾演嘅Annie,深受觀眾喜愛。今年佢終於有機會喺新劇《好日子》擔任第二男主角,真係可喜可賀!

張達倫表示其實之前做咗咁多年都冇咩成績,令到佢長期處於想放棄嘅狀態,每次都要自我安慰:「在這山,望那山永遠唔會成功㗎。」。而張達倫上位後亦冇「唔識人」,坦言好多謝同佢拍咗8年拖嘅黎芷珊,亦難忘佢嘅鼓勵同教誨。

雖然已經38歲,不過成為人夫同爸爸嘅佢亦多添咗一份成熟男人味。而且依家要為頭家同照顧囝囝,多咗一個清晰目標,工作一定會更加落力。希望無綫可以俾多啲機會佢發揮啦!