捧做馬國明No.2?《愛回家》金城安想試其他角色

周嘉洛憑「廢青金城安」一角成功入屋。

「廢青金城安」周嘉洛今日上電台接受鄭裕玲(Do姐)訪問,他笑言將「第一次」電台訪問交給對方,講到被嘟姐「投訴」太難約,他解釋:「依家播足7日,都差唔多日日都拍《愛.回家之開心速遞》。(嘟姐鍾意小鮮肉喎!)佢係鍾意靚仔嘅小鮮肉,我未達標!(你會學農夫駁咀?)佢哋都係為效果,相信佢哋私下都好尊重嘟姐、而嘟姐都好錫佢哋。」

想試其他角色

談及他拍《愛》後深受師奶歡迎,周嘉洛指:「係我嘅榮幸!其實都有好多小朋友鍾意我,佢哋喺街叫我『廢青』會覺得係讚賞,因為之後就話要合照,鍾意先合照嘅,除非佢用嚟打小人!(好多時都集中喺你哋班後生仔度。)係好開心!(會拍其他劇?)隨緣,暫時冇諗咁多,因為《愛》都好發放正能量。(唔想試其他角色?)想,但唔急於一時,如果將來有時間會把握,無論咩都想試。」

成當旺小生的他,對於有傳被指接馬國明班,他即謙稱:「實在係個美譽,自己冇諗咁多,暫時都係得一套劇,做好當前嘅嘢先,上位都要有好多因素。」拎完「最佳男配角」身價暴升?他笑言:「自己冇深究,要問吓經理人,但依家個市好淡,都冇辦法,自己好彩都頂得住,生活唔成問題,冇顧慮、冇擔心。」