拍拖一年多 感情一日千里!單文柔 五招收服陳展鵬

東方新地 - 娛聞

娛樂圈又有喜事啦!現年41歲的陳展鵬昨晚向傳媒發聲明,正式宣布與28歲前港姐女友單文柔(Phoebe)結婚!恭喜恭喜!

煎Pang曾經講過:「每次拍拖,我都以結婚為目標,就算我20歲時拍拖,也希望結婚,但感情無人可保證到。」而他與單文柔拍拖僅一年多,感情一日千里,到底Phoebe有咩招數可以咁快收服性格慢熱內向嘅煎Pang,一齊睇睇啦……

撰文:東方新地| 圖片:新傳媒圖片

延伸閱讀:

(有片)《延禧攻略》爆笑NG片曝光!佘詩曼雙語讀對白,一招K.O內地演員!

戰勝抑鬱逆流而上 55歲黃德斌娶患難妻

41歲陳展鵬 宣布迎娶28歲單文柔

41歲視帝陳展鵬、與28歲落選港姐單文柔去年三月爆出戀情,其後一直都將戀情低調處理,不過昨晚煎Pang宣布拉埋天窗啦!

碰杯都拖手仔,閃到呢!

求兩次婚 抱得美人歸

Phoebe接受傳媒訪問,大爆展鵬求過兩次婚,第一次在香港趁佢瞓覺時,用一隻自己摺嘅心形紙戒指戴喺佢手,我醒咗先發現,雖然好冧但單文柔都say no,佢記得我鍾意手工藝,或者花心思嘅嘢,之後第二次喺英國,佢搵咗條街好多人又有巴士嘅大街再跪低求婚,佢最期待嘅畫面終於出現,咁感動當然點頭say yes啦!

婚照除咗有歐陸式建築物及街景外,最特別係喺一架寫住「520 Next Station Marry Me」前,陳展鵬跪低送花向單文柔送花!

展鵬着上簡單西裝配對波鞋,非常隨意!

10月簽字結婚

二人將於10月簽字結婚,又會同兩邊屋企人食晚飯慶祝,佢哋都希望有個低調、屬於自己嘅美好回憶嘅婚禮,好多細節仍在安排中,問到係咪雙喜臨門有bb?單文柔否認,仲話冇諗過自己咁早結婚,但最終被男友真誠打動。

陳展鵬致各傳媒友好:「各位親愛的傳媒朋友、各位好友,多謝大家一直對我的支持和包容。今日,好高興同大家宣布,我要結婚啦!一路以來,我都全情投入工作,直至Phoebe的出現,讓我們感受到幸福和信任。對於感情方面比較傳統的我,是時候用我最大的努力去建立一個美滿的家。多謝大家的關心,希望得到你們的祝福。」

二人感情 先苦後甜

煎Pang早前出席活動時春風滿面,原來人逢喜事,有記者問到點睇二人倫敦之行被途人偷拍,他大方承認去了一星期:「佢喺英國讀書,算係舊地重遊,現場有好多華人,我都有同啲小朋友影合照,冇所謂。向來低調處理,她比較辛苦,呢兩年我有好多緋聞同唔太好嘅新聞出現,佢都喺我身邊,陪住我,我好感激佢,我性格唔係好Sweet,行動勝於一切,希望之後先苦後甜。」

他更以行動表示對女友一條心,在半年已將IG內大部分女藝人和女性朋友統統刪除。

擔任港姐星級評判 邂逅單文柔

單文柔在倫敦藝術大學倫敦時尚學院,修讀布料設計學士課程。大學畢業後曾任職布料設計員,2016年參加港姐,在首圈十強出局。同年底入TVB藝訓班,之後主要做兒童節目主持。

而單文柔在選港姐期間,邂逅了擔任港姐星級評判的煎Pang,當時台上司儀問到心水佳麗係邊個,佢話本來想揀10號嘅單文柔,但因為尊重胡定欣所以唔敢揀,但最終佢都係揀咗單文柔做佢老婆,呢啲咪緣份天注定囉!

與單文柔同屆嘅港姐有劉穎鏇、張寶兒、蘇韻姿、馮盈盈!

戀情起初不為fans接受

加入TVB已近十年的陳展鵬憑《城寨英雄》成為視帝,事業走上頂峰,更同胡定欣因《城》成為螢幕情侶,人人認定他們是一對,以為佢哋可以有情人終成眷屬,惟煎Pang被踢爆原來暗撻單文柔。

戀情曝光後,一度令煎Pang人氣急跌,單文柔也被鬧係壞女人,但煎Pang好man,未有袖手旁觀而係處處維護,之後更罕有地大方承認對方女友的身份,讓二人感情突飛猛進,隨住時間久了fans都開始接受戀情,更有網友話佢哋愈來愈合襯,真係守得雲開,苦盡甘來…

性格純品又溫柔

煎Pang性格內向又悶蛋,份人仲好傳統,而佢向來對感情事也低調處理,單文柔都會配合男友作風,未有把感情事掛嘴邊。直至去年煎Pang才首度開腔談感情事,表示二人相識大半年,他大讚女方好純品、冇機心,相處過程十分開心。他也直言自己屬適婚年齡,若然將來結婚,定會大方公開喜事,果然講得出做得到!

愛屋及烏 孝順陳媽媽

煎Pang都係圈中出名嘅孝順仔,入行多年來都係同媽咪住,據知單文柔唔介意和陳媽媽同住,也與未來奶奶相處得不錯,知道陳母近年身體唔好,而煎Pang出埠的時候,她也會代為照顧。識得愛屋及烏,難怪煎Pang認為她非娶不可!

愛低調拍拖行善

臨近農曆新年,煎Pang帶住單文柔去咗筲箕灣護老院探訪一班老友記,單文柔同班義工幫手將一袋袋禮物送畀老友記,又陪啲老友記玩手工,被班老友記集郵,煎Pang當然唔會say no啦,見到班老友記個個笑晒口,一定過咗個好開心嘅晏晝,拍拖都不忘做善事!抵讚!不過煎Pang究竟幾時賜女友一個名份啫?

陳展鵬喜歡低調行善,不時會探訪護老院,臨近農曆新年,煎Pang帶埋另一半單文柔去探訪,好有愛心!
去到邊都成為焦點,兩個亦唔介意孖住同大家合照,單文柔企喺煎Pang旁邊,小鳥依人,笑得特別甜。
離開嘅時候,煎Pang同單文柔不斷被街坊蜂擁上前集郵。
單文柔跟同屆港姐張寶兒由選港姐時已經好好朋友,大家嘅現況亦好相似,都係落選港姐戀上無綫一線小生,煎pang同單文柔修成正果,唔知幾時到袁偉豪張寶兒呢pair呢?!

啱嘴形

單文柔是去年她選港姐時認識,她在英國住咗多年,也在當地讀Fashion。而煎Pang又對當地的時裝很感興趣,二人一開始有共同的話題,煎Pang覺得二人好啱嘴形!

為煎Pang學煮中餐

Phoebe早前有份做《美女廚房》,她透露自己平時都很喜歡下廚,但比較鍾意煮西餐,她從節目中偷了不少師,因為知道男友愛吃中餐,所以為陳展鵬開始學習煮中餐,仲要男友做其白老鼠㖭!

其實煮得好唔好食其次,最重要有心為愛人下廚,甚有做老婆嘅條件,難怪煎Pang咁快決定結婚!

二人對戀情向來低調,而煎Pang近年漸漸帶女友出席公開場合,之前更約埋黎諾懿夫婦拍拖睇騷!

延伸閱讀:

王君馨吹功了得 孖老公馬爾代夫造人