拍冇著衫戲被人偷拍 陳瀅嬲爆:感到被侵犯


《黃金有罪》劇照

無綫新劇《黃金有罪》喺噚晚首播,故事講述70年代嘅香港,當時經濟起飛股票市場旺盛,各人同樣等候一個改變命運嘅機會。劇中陳瀅(Jeannie)飾演貪慕虛榮嘅水敏婷,成日掛住扮靚買衫,諗盡方法點樣去搵多啲錢,令屋企生活過得好啲,個角色都好有得發揮。

不過Jeannie前幾日喺IG Story講拍攝時發生咗一啲不愉快經歷. 佢IG寫:「投影冇著衫,唔認,之後仲要唔肯delete!!!!你唔係女人,你梗係唔明。What's wrong with you? You should be ashamed of yourself.」齋睇都估到發生咩事,佢都有解釋係拍攝時遇到不幸嘅事,其中一場戲佢要著「少布」啲,點估到會有個男人喺嗰度影相,之後工作人員都好禮貌地同佢講「陳瀅而家冇著衫,淨係包住條毛巾,好似唔係咁好,咁你不如delete咗佢啦。」但對方都唔願意刪除。

Jeannie噚日出席劇集活動時接受傳媒訪問,佢話可能女人先會明呢樣嘢,有少少好似俾人侵犯嘅感覺。最後搞咗一大輪,個男人先肯刪除,否則佢會考慮報警。Jeannie冇講到呢位男性係工作人員定係路人,淨係話佢唔係同一隊crew,但都唔算係路人。

《黃金有罪》劇照