【拆彈專家】新聞節目講真實工作範疇 不止剪條電線咁簡單

天王劉德華在電影《拆彈專家》(2017)中講過一句型爆對白:「拆彈唔係你想做就做,係要個天批准。」或者加入警隊爆炸品處理課的確要個「天」去批准,但就算個「天」的確批准你去做,但始終都要接受一連串嚴格而專業的訓練,才能正式成為一個「拆彈專家」。

今年,灣仔沙中線地盤內接二連三發現戰時炸彈,爆炸品處理課的「拆彈專家」每每都奉召到場為大家解除危機,而無綫最近便在新聞資訊節目《時事多面睇》為觀眾介紹「拆彈專家」的最真實一面。

炸彈處理主任張立德在節目中指第二枚的炸彈最難搞,因為它在半空中卡住,就算不引爆,其一千磅的重量亦足以壓力一個人,如果不幸真的爆炸,後果亦相當嚴重:「基本上喺佢方圓20米至30米範圍裏面都會變成塵埃、唔會再存在;衝擊波可以去到1、200米,甚至係去到500米,會破壞物件,門窗會爛;再還啲嘅,爆炸時會有好多碎片,可以彈到好遠,1、2000米都有可能,而呢啲碎片係好高溫,擊中人或者物件嘅話,破壞性可以好大。」所以周邊地區的人應該要盡早疏散。

雖然在《拆彈專家》中所有「拆彈專家」都是男性,但其實警隊爆炸品處理課裏面都有女性隊員,後備小組炸彈處理主任鄺靈楓便是其中一個,節目中她便親身示範穿上重達65磅的防爆衣模擬走向爆炸品的情況:「我哋其實係採取『One Man Risk』,淨係會一個人行去,中間個過程都幾漫長,我哋會叫『Long and Lonely Walk』,聽唔到其他聲,淨係會聽到自己呼吸聲。」

提到她是少數的女性「拆彈專家」,她在節目中說:「我唔認為因為我係女仔,所以有啲嘢就做唔到,我做警察嘅原因好簡單,我想保護我鍾意嘅人,我想保護我屋企人,冇人份工作,比起做拆彈主任更能感受呢件事。」

眾多的影視作品都以「剪線」這個動作去演繹拆彈過程,但其實這個情況要在極危急時才會發生,亦不會靠估去決定剪哪一條線,張立德說:「我哋最大嘅訓練模式,係點樣可以喺最短嘅時間裏面了解炸彈嘅結構,要先了解炸彈結構,才可以明白點樣停止炸彈運作,從而安全咁處理炸彈。」而除了解除炸彈外,爆炸品處理課亦會參與反恐、保護要人的工作,在需要情況下,可以立刻處理爆炸品和生化核事件,高級炸彈處理主任周錫健:「我哋嘅工作有三個『D』,第一個『D』係危險(Dangerous)、第二個『D』係困難(Difficult)、第三個『D』係污糟(Dirty),我哋嘅工作就係包含呢三個元素。」

點擊瀏覽《香港01》更多內容和圖集

你可能感興趣:
【周末午夜場】《新不了情》橫掃金像獎 獨欠劉青雲輸了影帝給他
周秀娜角逐東方奧斯卡影后 抽空赴美觀賞時裝騷