【打工仔夢想】吳卓羲收藏40隻名錶7架車 仲三年供完一層樓

喺2002年,無綫開拍劇集《衝上雲霄》,吳卓羲(Ron)、陳鍵鋒、黃宗澤(Bosco)和馬國明組成S4;喺2004年無綫將林峯、吳卓羲、陳鍵鋒、黃宗澤、馬國明及黎諾懿組成「奧運六星」,深受觀眾愛戴。佢哋當年一齊被力捧,不過經常遭人比較。去到今時今日,就只係淨返馬國明同黎諾懿一直留喺無綫。黃宗澤其後加盟邵氏兄弟,主力於內地發展,並偶爾接拍港劇。而吳卓羲亦不時以自由身身份參與邵氏兄弟劇集,分別於香港及內地發展演藝事業。

四人其後嘅命運都各有不同,馬明出名好仔,係圈中嘅黃金筍盤,事業愛情發展唔錯,經常做男主角,而早前大結局嘅《降魔的2.0》亦極受歡迎,啱啱仲同湯洛雯公開戀情。黎諾懿雖然事業就唔夠馬明發展得咁好,不過佢已經擁有一個幸福家庭。而黃宗澤喺內地人氣強勁,而家拍劇每集劇酬至少40萬人民幣起跳!而且唔少人都知道一向鍾意煮嘢食嘅佢落咗唔少本錢投資酒吧餐廳,亦喺香港有開高級Fusion餐廳,係圈中嘅小富翁。

不過自從吳卓羲離開咗無綫後,好似唔係太多人知道佢有咩搞作,亦唔知佢究竟賺幾多。不過啱啱喺《Tiger's talk》受訪嘅時候,吳卓羲就被問到有冇收藏名錶嘅興趣時,佢就話有收藏約40隻。而呢個興趣喺佢年輕嘅時候開始,因為當時見到木村拓哉手上戴著同牌子嘅錶,令到佢覺得戴呢隻名錶就係男人嘅夢想。而陳山聰亦大爆對方16年前拍《大唐雙龍傳》時就已經開始戴名錶,仲估佢當時隻錶而家已升值到30多萬。除咗玩錶之外,吳卓羲亦有7架車。另外佢亦鍾意投資「磚頭」,2013年佢以900萬港元買下深井一個1,200呎單位,如今已升值至1,700多萬港元。吳卓羲仲有一層樓屬於投資性質出租,更有消息指佢買樓後3年內就已經供完層樓,真係唔少打工仔嘅夢想!

吳卓羲