【打出美國】《葉問4》一個故事各自表述 中晒兩岸觀眾口味

《葉問4》到底係唔係最終章?明明講緊今集係完結篇,但3月香港影視博覽開記招時,丹爺又鬆口遊花園話故事有機會發展落去!無論係咪系列大結局,無疑《葉問》系列喺呢10年好成功,票房成績好之餘,戲中對手亦不斷進化,由洪金寶到前職業拳手泰臣到今集大戰美軍,打親都贏、戰無不勝,不負「宇宙最強」呢個朵!

今集主題係為華人爭光,一洗華人在外被恰嘅弱者形象,所以《葉問4》背景設於美國,講述遠赴美國開館的李小龍(陳國坤 飾)因授武予洋人以得罪當地人馬。葉問(甄子丹 飾)現身引導李小龍以武震懾整個唐人街,以仁德令華洋各路人馬折服,懂得武術貴乎共融,終成為真正宗師。

為國爭光當然要同外國人對戰,今次奸角由英國動作演員Scott Adkins飾演。香港觀眾可能因為Marvel嘅《奇異博士》,對呢位反派角色有印象。其實Scott Adkins早於2015年已經同吳京合作過《戰狼》,拍華語動作片有相當經驗。

其他打得之人仲包括吳建豪、內地武打演員吳樾及陳國坤等,無論係真正習武之人定運動健將,相信喺武術指導袁和平嘅設計下,動作場面一樣咁好睇。

依家中美貿易戰,電影為華人爭光,打到美軍落花流水呢條線,相信內地觀眾會好受落;同時《葉問4》預告片大講習武之人「遇到不公義之事,我一定會企出嚟」,呢句說話對香港觀眾又別有一番意義,有意無意之間照顧到兩岸三地觀眾嘅需要,落筆都幾聰明!

希望現實有多啲演藝人員就不公義發聲啦。《葉4》內李小龍戲份都唔少,事實上其影響力直至今日依然強勁,無睇《唐山大兄》都識講「Be Water」,電影要拍親「華人之光」一定有李小龍份,可惜成就再大都得唔到政府及演藝界嘅重視,今時今日喺香港連紀念館都無個,剛剛仲拆埋李小龍嘅故居,原址好似用嚟起教學中心喎!

保護香港文化,真係好難!