戴祖儀獲過招搶男人!

東方日報
有機會拍劇兼唱插曲,戴祖儀超興奮!

「港版新垣結衣」戴祖儀憑《多功能老婆》一劇火速彈起,IG Followers於個多月內激增逾兩萬!原來連小學生都中「劇毒」,認定她是劇中慘情女,群起過招教她硬搶周柏豪!

24歲的戴祖儀處女拍劇回響大,在《多》劇單方面癡戀「Oppa」周柏豪,可惜意中人眼中只得「藍飛」楊千嬅。日前她到小學拍攝節目,中晒「劇毒」的小學生全部稱呼她為「Miss呂」,她說:「好似真係做老師咁,依家啲小學生好叻、好早熟,佢哋教我點樣去贏Oppa柏豪返嚟,劇集真係令到大家好投入,多咗好多人認識我。」

拍劇唱插曲似中獎

最令她開心的是,首次有機會唱埋劇集插曲《天光前分手》,她笑說:「嘩!打孖上,個感覺好似中咗六合彩。(同劇仲有由楊千嬅、柏豪及吳若希主唱嘅劇集歌喎?)我係新人,好驚,佢哋啲歌太好聽,唱得太好,自己好似唔同級數,所以我用咗好多時間揣摩同練習。」而她最近極受綜藝節目的監製喜愛,分別加入《學是學非》、《娛樂大家》及《#後生仔傾吓偈》,其率真自然的表現深受觀眾喜愛,人氣不斷上升!

讚羅天宇好仔

談到近日與羅天宇傳緋聞,她即指添煩惱,皆因連父母都「信以為真」,她笑說:「唔係真(口架)!」問到會否斬釘截鐵否認?她即變得口窒窒,坦言第一次傳緋聞很慌張,連羅天宇亦問她:「會唔會有啲唔好嘢?會唔會畀人鬧?」但她認為「大家行得正、企得正,冇乜所謂啦」,又說:「入行預咗有唔同新聞。」至於雙方是否有發展機會?她語帶保留:「世事呢啲嘢好難講嘅,我又唔敢講到咁死一定冇,暫時大家冇呢方面嘅諗法。」並自爆因傳緋聞,令原本跟羅天宇唱Cover歌及應邀亮相其頻道做嘉賓的計劃全部擱置,笑說:「遲啲先,費事再發酵,好似變咗真嘅!」而在她眼中,對方是「公認好紳士嘅好男仔」。

場地:Mini Hotel(銅鑼灣)

髮型:Bowie Lo@AdmiX hairstyling

化妝:King Yop@kings makeup

服裝:Tommy Hilfiger

同羅天宇傳緋聞,戴祖儀坦言怕怕!