戰勝抑鬱逆流而上 55歲黃德斌娶患難妻

東方新地 - 娛聞

遇到有情人,應該是人生最大福氣。55歲黃德斌,與同行十三年的圈外女友Joyce Wong (黃美恩) 有情人終成眷屬,上周六 (9月8日) 在酒店註冊拉埋天窗,雖然婚宴並冇大事鋪張,同女友只是著情侶裝便服行禮註冊,不過,娶到陪自己走過人生高低起跌的賢內助,黃德斌幸福不言而喻。原來11年黃德斌因拍電視劇《心戰》,演出沉重的「心魔」角色,曾患抑鬱跌落情緒谷底,幸得女友扶持捱過難關,今日事業可以逆流而上,黃太應該是他人生最大動力,功不可沒!

撰文:東方新地|圖片:新傳媒圖片、黃德斌微博

延伸閱讀:

(有片)《延禧攻略》爆笑NG片曝光!佘詩曼雙語讀對白,一招K.O內地演員!

違背父願 棄做運動員 何雁詩加簽保鄭俊弘

黃德斌 愛的宣言冧老婆

近日「雙喜臨門」的黃德斌,除咗有份擔演的小品電影《逆流大叔》票房衝破1,300萬事業旗開得勝,同拍拖十三年的圈外女友黃美恩 (Joyce) 感情亦開花結果,上周六 (9月8日) 在金鐘一間酒店舉行Cocktail Party註冊拉埋天窗。展開人生新一頁,黃德斌冇選擇大排筵席,只在酒店舉行簡單而隆重的婚宴,與一班至親好友慶祝人生大事,黃德斌愛的宣言亦簡單直接:「佢好了解我!婚前婚後大家都係互相欣賞,遷就,信任和尊重。」

即使未有大排筵席,亦冇傳統接新娘儀式,但婚宴簡單得來卻好有愛,同至親好友慶祝的黃生黃太,全日表現興奮,切結婚蛋糕 一刻,平日內斂的黃德斌,亦開心到擘大個口笑,升呢做人夫的他幸福滿瀉!
黃德斌夫婦未有著傳統禮服及婚紗行禮,不過在婚宴上兩公婆打扮卻襯到絕,以紅白藍情侶便服出席婚宴,兩人讀完誓詞簽完婚書,互為對方戴上結婚戒指一刻,表現感動。
結婚戒指是卡地亞簡約款式。
雙方父母見證婚禮,黃德斌正式升呢成人夫。
跟女友同樣性格低調,黃德斌婚禮只以Cocktail Party形式招呼至親好友一齊慶祝,圈中好友戚其義、簡慕華、何啟南、徐榮及趙希洛等都有到場祝賀好友。
一直被指是監製戚其義愛將的黃德斌,在TVB時期拍過唔少對方大熱作品,大婚好日梗唔少得這位伯樂一齊慶祝。
註冊完畢,黃德斌招呼親友吃自助餐。
婚宴現場放有多張黃德斌同老婆早前拍的婚紗照,證明低調的黃德斌對一生人一次的人生大事其實相當細心,精心安排給太太留個最美回憶。

拍劇致抑鬱

簡單幾句已經夠晒窩心,的而且確,同年輕十六年的黃太Joyce Wong (黃美恩) 患難見真情,兩人05年相識,當時黃德斌 拍完電視劇《金枝慾孽》,事業剛開始有起色,之後連拍多部劇集《火舞黃沙》、《珠光寶氣》等都擔演重要角色,受觀眾關注,不過,11年他就因連拍兩部角色沉重的電視劇《天與地》及《心戰》,長期要徘徊情緒低位,令他一度抑鬱不能自拔,幸當時得女友Joyce陪伴支持才得以振作。據知情者透露:「嗰時佢啱啱拍完《天與地》,無耐又接到《心戰》嘅角色,為咗演陳豪嘅心魔『邪惡』,Kenny因為太過投入,搞到跌落情緒谷底,當時佢都唔知自己有病,只係突然之間心情好低落,完全唔想見人,將自己收埋喺間屋度,冇晒鬥志,不過Joyce都對佢不離不棄,一路喺佢身邊鼓勵同支持佢,幫佢走出困局!所以Kenny成日都話,Joyce係最了解佢嘅人,如果冇咗佢,自己都未必可以捱到今時今日。」

黃德斌有份參演深度劇集《天與地》,劇中人物一生坎坷,為演出令他長期處於情緒低位。
拍《心戰》演劇中人格分裂的陳豪內心的邪惡心魔,更因太投入而引發抑鬱。

右耳失聰

自細家境清貧的他,早年更試過耳朵入水發炎,因延誤求醫而導致右耳失聰。據知情者透露:「中學畢業之後,佢做過一排跟車工人,嗰時每朝返工前,佢都會去游水,一次唔小心入咗水落耳仔度,就算唔舒服都冇錢睇私家醫生,去政府醫院排期要等一年半,點知有朝早佢瞓醒發現枕頭都係血,原來耳仔發炎流膿,佢阿媽嚇到即刻同佢去睇急症,醫生要佢即時入院開刀,不過最後都因為醫得太遲,依家佢右耳只剩番三成嘅聽力!」

雖然人生多災多難,但黃德斌學會提醒自己要保持正能量,除了遺傳自母親的堅毅精神,亦多得女友的樂天性格影響。據知情者透露:「入行以嚟,佢遇過好多波折,捱咗咁多年,但佢從來冇諗過放棄,佢好有毅力,但豁達性格可以話係畀Joyce感染,Joyce份人好樂天,就連岳父岳母都好玩得,呢幾年Kenny都開咗竅,好多嘢都唔再執著!」

港產小品電影《逆流大叔》大獲好評,電影至今已衝破1,300萬票房佳績,對轉戰影壇的黃德斌來說可說是個好開始。
《逆流大叔》寫大叔奮鬥故事,因遇上公司裁員潮,一班大叔吳鎮宇、潘燦良、黃德斌等狂操扒龍舟出賽,戲中黃德斌更有跳海戲,他跳足17次拍水底場面,十分搏命。

湊B出巡

婚後黃德斌已火速復工,為《逆流大叔》謝票,新婚的他被問到可有努力造人,型佬黃德斌幽默表示:「唔話你知,呢啲咁私人嘅問題,得喇!總之我會保重身體!」不過,早於三年前,黃德斌同女友的身邊就經常出現一個神秘B仔,兩人一得閒就孖住湊B,雖然黃德斌已經否認是B仔老竇,表示是幫朋友湊B,但湊住人哋個B都如同己出一樣細心,可見黃氏夫婦相當鍾意小朋友。日前,黃德斌又揸車「一家三口」去奧海城買玩具,只見黃德斌同老婆帶B仔去揀玩具車,更慈父上身陪B仔慢慢揀,揀完禮物,他又急不及待抱起B仔,邊行邊逗佢玩,父愛氾濫的黃德斌,生仔有心有力,相信好快會有好消息公布!

未有自己小朋友的黃德斌,日前兩公婆又湊住他口中的契仔「一家三口」出動,只見黃德斌細心抱住B仔,哎吔父子還襯到絕齊齊帶超,好有父子相。
帶住B仔去買玩具,兩公婆有商有量,不過都係任由B仔自己揀心頭愛,老婆Joyce仲踎低陪B仔一齊揀,細心同B仔逐樣講解。
黃德斌
黃德斌揸車載老婆同契仔去飲茶,只見他先緊張抱B仔上車安頓好,由老婆抱住B仔,自己才上司機位開車。
黃德斌
黃德斌揸車先去接岳母,再一行四人去酒店飲茶。

同場加映:《珠光寶氣》暗戀林保怡

近日在無綫深夜重播的《珠光寶氣》中,黃德斌飾演「游日東」,因暗戀林保怡,同林保怡及邵美琪發展出微妙的三角戀。

珠光寶氣
珠光寶氣

近日劇情講到邵美琪以為黃德斌戀上自己,因此自告奮勇去開解他,但最後卻發現黃德斌原來一直暗戀林保怡!

珠光寶氣
珠光寶氣

55歲黃德斌迎娶女友

黃德斌早年公開講過想事業有成後,先至迎娶女友,佢哋原來早前秘密入紙申請註冊結婚,德斌接受傳媒訪問時透露,覺得是時候結婚,佢仲話求婚必需要有戒指,但唔會擺酒以及度蜜月,只是同屋企人食餐飯,希望婚事低調同簡單!

德斌接受傳媒訪問,被問到點解唔穿西裝婚紗出席,佢話影婚照已經着咗,同親戚朋友開Party食吓嘢所以得簡便啲,他又指老婆很了解其性格,婚前婚後都會互相欣賞、遷就、信任和尊重。

黃德斌對女友好專一,而且入行多年零緋聞,好難得!

對於經常被影到同女友拍拖湊BB,而且黃德斌肉緊狂啜B仔額頭,父愛氾濫,但他否認BB係佢嘅兒子,仲話係的話冇得唔認㗎!

黃德斌 約滿離巢外闖

入行30年的黃德斌先後效力無綫25年,一度在劇集《刀下留人》做男一,但近年已冇乜機會擔正,去年約滿決定離巢外闖。據知近年德斌唔係客串就係做男二,所以覺得係時候出去闖吓,所睇吓有冇機會拍內地劇,不過據知依家都係搭緊路,未有新動靜!

拍拖13年

黃德斌有個拍拖18年的女友黃美恩 (Joyce),雖然至今仍未有結婚計劃,但對女友卻錫到燶,幾年前就打本畀女友在尖沙咀開時裝店,不用開工二人亦秤不離砣。二人在假日不用工作的時間,經常拍拖踩單車,非常恩愛!

稱幫朋友湊

15年初,黃德斌被發現與女友之間多咗個「神秘B」,經常孖住湊仔。據知德斌話BB係佢朋友個仔,叫做稀稀,佢同女友都好錫個BB,女友仲成日湊埋個B返時裝店開工㖭!不用工作的日子,黃德斌將全副心機時間去湊仔,本月中,二人湊住B仔到尖沙咀一間平民餐廳開餐,入到去黃德斌先揀個隱蔽位置抱住B仔坐好,B仔忽然扭計扁晒嘴,德斌就緊張到即刻哄埋去狂啜B仔,氹到BB即時笑番。

15年底,黃德斌不時同女友湊住「神秘B 」去公園玩,當時B仔未夠1歲。
雖然多次否認係B仔老竇,但黃德斌湊B手法純熟,同女友似足緊張父母,呢個畫面完全係一家三口幸福家庭樂!
黃德斌見B仔扭計,即刻哄頭埋去錫錫,完全一副慈父相!

女友錫手仔

吃了大約一小時埋單走人,黃德斌抱住B仔同女友行去附近攞車,路過報紙檔見到有玩具車賣,佢又即刻買畀B仔玩,期間黃德斌女友不時用手摸B仔面珠及撥他頭髮,更忽然冧爆捉住B仔手仔錫,雖然多次否認係BB老竇,更曾揚言同BB毫無關係,但當日所見,卻似足一家三口幸福家庭樂!

黃德斌對B仔溺愛有加,路過報紙檔又買了一架玩具車給他玩!

B仔不離手

雖自稱幫朋友湊B,但黃德斌就算同圈中好友戚其義、郭少芸的飯局,例牌一家三口列席,而女友為父母慶生都抱埋B仔,關係非常親密!

【延禧攻略】原班人馬開新劇!《皓鑭傳》邊個冇得留低?

有情有義 情路坎坷!邵美琪 靚足33年

【港姐2018】港姐踏入45年!細數10項歷屆冠軍之最

【再創世紀】周柏豪靠鼻哥窿搶鏡? 網民:睇到好尷尬!

周柏豪

【再創世紀】女主角鬥喊功 鍾嘉欣、楊怡、周勵淇邊個最慘?

【延禧攻略】光頭定有頭髮靚仔啲?盤點《延禧》三位小鮮肉chok爆對比照

光頭

延伸閱讀:

潮服店執笠 徐濠縈箝實少女康堤