【我到底睇咗乜嘢】呢套新戲係講一個雪櫃參加歌唱比賽嘅故事……

全世界都好似好熱衷睇歌唱選秀比賽,香港一向都有歌唱比賽,近年又有《全民造星》捧咗一班本地偶像出嚟,最緊要捧紅咗姐姐最愛嘅姜B姜濤出嚟。韓國有Produce 101、美國有全美偶像大賽、歐洲都有極大型嘅Eurovision,比賽往往發掘出唔少有潛質新人,其中得獎人仲成為天王巨星。如果有日話你知比賽不限物種,連智能家電都可以參加,人類仲有幾多勝算?

科技發展一日千里,人工智能同日常生活息息相關,漸漸取代咗低技術工作,隨著人工智能越嚟越進步,會唔會有一日直接取代人類呢?法國導演Benoît Forgeard建基於對呢個話題嘅想像,拍出一套爆笑喜劇All About Yves(台譯:《我的情敵是冰箱》)!

故事講述Jérem(William Lebghil飾)為夢想製作一張hiphop大碟,不過其貌不揚、才華成謎嘅佢一首歌都無hit過,無錢之下唯有搬返去同阿嫲住。一日,有科研公司代表索女So上門推銷公司智能雪櫃Yves,Jérem喺美女面前無抵抗能力接受咗Yves入屋。

最初Yves同一般智能雪櫃無疑,幫手處理下啲濕醉小事,慢慢Yves越做越多,仲幫Jérem作埋曲,勁在作品大受歡迎兼令Jérem紅咗!越嚟越有性嘅Yves仲代表法國參加Eurovision大賽,打低德國洗衣機、義大利咖啡機贏埋冠軍!咁都未夠,Yves仲因為風趣幽默、適當時間講適當說話而溝死女,迷倒Jérem女友,變成3角關係,1 男1女同個雪櫃玩3P!

戲內Yves仲有玩跳傘,如果佢係人的話,佢生活都幾多姿多彩簡直活出彩紅,難怪溝到女!電影先後參加多個包括康城影展、西班牙Sitges奇幻影展、金馬影展等國際影展。電影因為瘋狂爆笑同夠天馬行空而得到唔少關注,不過20年前都無人諗到智能電話可以做到咁多嘢,個雪櫃識作曲溝女會唔會係遲早嘅事?