成功演活公主驕媽 呂慧儀做咗無綫「御用巴渣港女」

近排無綫劇集《親親我好媽》熱播,深受觀眾及網民歡迎,除咗因為內容能夠反映現時社會狀況之外,亦反映咗唔少媽媽嘅心聲。不過除咗對劇集內容有共鳴之外,劇集演員亦獲得唔少關注,就好似跑出嘅清純學生妹江嘉敏。近排又有網民發功捧咗一個「御用巴渣港女」,佢就係長腳蟹呂慧儀。

呂慧儀今次喺《親親我好媽》入面飾演公主驕媽,除咗講嘢乞人憎、尖酸刻薄、一副囂張嘴臉、又經常向老公發脾氣,仲要怪獸家長上身,過分溺愛同保護自己個仔等等。佢將角色演繹得淋漓盡致,雖然角色乞人憎,不過正因為咁佢嘅演技就被一班網民激讚:「倒模咁演」、「似被監製定咗型」,更指「高太以前就是余花,生咗囝囝之後變成高太」,仲話除咗佢之外,其他人做呢啲角色會好乞人憎,好想打佢。

雖然呂慧儀嘅樣就真係有幾分典型港女相,不過大家都唔可以抹煞佢之前嘅訓練。就好似佢之前喺《一屋老友記》中同樣飾演一名上咗年紀少少嘅「o靚模港女」余花,講嘢同樣尖酸刻薄、郁啲就發脾氣同尖叫、又拜金等等,長腳蟹喺做「港女」方面都可以話係訓練有素。

如果各位真係好欣賞佢嘅話,咁就真係有眼福啦!事關下星期一開始播映嘅處境劇《愛.回家之開心速遞》又有呂慧儀!佢今次就做劉丹嘅二女熊若水,一聽個名就知又係一個港女角色,當中佢會經常同飾演三妹熊心如嘅蘇韻姿鬧交,招牌揼地尖叫當然唔少得。大家到時最緊要分清楚自己究竟睇緊邊一齣劇集,唔好搞亂佢究竟係做緊人阿媽定係做緊人個女啦!