憑《開心速遞》垃圾清一角成功入屋 周梓盈宣布離開無綫

周梓盈

無綫處境劇《愛‧回家之開心速遞》口碑及收視都不俗,劇集除咗令唔少劇中主角人氣急升之外,唔少配角都成功入屋,當中包括飾演過大小姐秘書「垃圾清」嘅周梓盈。正當大家期待緊佢同Terry(李偉健飾)有冇機會可以成為CP嘅時候,周梓盈早兩日(12月31日)喺社交網站宣布離開效力7年嘅無綫,佢話合約嘅問題而離開,內心充滿不捨。佢話離開或者留低都唔係佢個人可以決定,不過都好多謝公司嘅栽培同機會。回復自由身之後,佢會休息一陣,然後再好好諗下未來動向。佢話如果有新方向就會同大家分享。最後仲話希望大家繼續支持《愛‧回家》,同埋期待阿清將來再同大家見面。

周梓盈IG

「𡃁模組合」Donut出道嘅周梓盈,由於外貌同萬綺雯有幾分相似,所以一直被指係年輕版萬綺雯。加入無綫7年嘅佢,雖然有唔少演出機會,不過都係飾演一啲唔起眼嘅配角,所以一直未能獲得觀眾注意。直至謝芷倫離開《愛‧回家之開心速遞》劇組後,周梓盈飾演嘅垃圾清就成為大小姐(林淑敏飾)嘅新秘書。垃圾清係一個單純嘅低調有錢女,平時做嘢懵懵地又唔夠醒目,係「破壞王」之一,激到大小姐成日鬧爆佢。雖然佢嘅戲份唔算多,不過就成功入屋,仲獲得網民愛戴。

「垃圾清」周梓盈
林淑敏 & 周梓盈

佢嘅離巢消息一出,除咗唔少網民都表示唔捨得及叫佢加油之外,劇集演員都有留言,好似林淑敏「休息,再行更遠嘅路!」、李偉健「要一路順風」及許家傑「一定有機會再合作 新年快樂」。