【《慶餘年》熱播】主角張若昀原來係富二代 李沁被封「雞腿郡主」

內地古裝穿越劇《慶餘年》由星期一(2日)開始喺無綫黃金時段播出,劇集由張若昀、李沁、陳道明及肖戰等人主演,喺內地播出時已經大受歡迎,所以喺香港播出時都獲得高度關注。

《慶餘年》劇照

有唔少網民都話男主角張若昀同劇中范閑一角差好遠,特別係容貌方面, 明明范閑係一個靚過女人嘅男人,但張若昀就俾網友笑佢大小眼﹑醜男﹑長相不貼近原著等等,都唔明點解搵佢做范閑,不過最後佢成功用演技征服內地觀眾。其實張若昀同范閑都有相似嘅地方,二人都係自細開始都衣食無憂,有錢仔住大屋。張若昀爺爺係北京著名建築師張志新,爸爸張健係內地著名電視劇製作人兼導演,又係傳播公司董事長,之前公司被收購賺咗5億人民幣。拍攝內地綜藝節目時,張若昀仲邀請陳柏霖去佢屋企,睇落好似北京四合院,但又有人話只係北京別墅區內仿四合院設計,佢所住嘅獨立屋別墅有大花園市價約2000萬。張若昀更被網友爆料話佢擁有私人飛機,真係一個不折不扣嘅「富二代」。

《慶餘年》劇照

而女主角方面,李沁喺《慶餘年》中飾演宰相之女林婉兒,佢嘅出場方式都幾搞笑,就係匿埋喺枱底偷食雞腿,佢個靚樣令到范閑睇到目瞪口呆。之後,有網民更封佢做「雞腿郡主」。李沁雖然唔係富二代,但佢嘅顏值同演技都令觀眾留下深刻印象。李沁輪廓好精緻,擁有雪白皮膚,成個樣都好清純。佢拍攝過多部古裝劇,例如有《新紅樓夢》、《如懿傳》及《楚喬傳》等等。有「古裝女王」之稱嘅李沁,亦係90後當紅小花之首。不過佢都幾慘,入行無耐竟然遇到電話騙案,佢將當時所有片酬匯咗俾陌生人,有傳涉及金額高達800萬。李沁更憶述當時警察問佢係唔係冇腦,未見過呢個年紀被人呃。

《慶餘年》劇照
《慶餘年》劇照
《慶餘年》劇照