《慶餘年》已首播 細數無綫穿越劇 最經典係呢套

內地古裝權謀劇《慶餘年》噚晚喺無綫首播,劇集搵嚟張若昀、李沁、陳道明、吳剛、辛芷蕾、宋軼及郭麒麟等人主演,以穿越為主題,講述范閑(張若昀飾)穿越到古代,期間鬧出唔少笑話。劇集喺內地播出時成功吸引內地網民熱捧,唔知劇集會唔會係香港掀起追劇熱潮呢?其實過往無綫都有唔少經典穿越劇,而家就同大家回顧一下啦!

《尋秦記》2001年

如果要講無綫最經典嘅穿越劇,相信唔少人都會揀《尋秦記》。劇集由古天樂、林峯、宣萱、郭善妮及雪兒等人主演,講述項少龍(古天樂飾)穿越時空回到二千年前嘅戰國時代,更遇上秦始皇(林峯飾),同時又遇到三位愛人,分別係趙倩(雪兒飾) 、烏廷芳(宣萱飾)及琴清(郭善妮飾)。呢個現代人喺古代鬧出唔少笑話,例如講嘢時中英夾雜及喺古代著T-shirt等等。

《尋秦記》

《九五至尊》2003年

劇集搵嚟由江華、張可頤及吳美珩等人主演,講述因為一個水龍捲,令到雍正皇帝(江華飾)及呂四娘(張可頤飾)雙雙由清朝穿越時空被捲到21世紀嘅香港。兩位古代人於現代時空生活,原本高高在上嘅皇帝嚟到現代嘅香港,仲要做一名「打工仔」李大蝦,真係笑料百出。

《九五至尊》

《EU超時任務》2016年

睇劇集名就知道係關於穿越時空,劇集由王浩信、朱千雪及袁偉豪等人主演,劇情最特別嘅地方就係不停圍繞4月1日至4月3日。另外,「芬機粒」朱千雪同埋「屎渠頭」王浩信由最初嘅冤家變成戀人,但二人感情遇上考驗,渠頭最後為咗救返阿風,寧願忍受阿風唔記得佢嘅痛苦,選擇再次穿越返到去4月1號,睇到大家都眼濕濕。

《EU超時任務》

《超時空男臣》2017年

由蕭正楠丶曹永廉丶何廣沛丶田蕊妮丶王君馨及朱晨麗等人主演嘅《超時空男臣》,劇情與韓劇《閣樓王世子》十分相似。一開始劇情就由明朝講起,講到大將軍袁崇煥(蕭正楠飾)、大學士左光斗(曹永廉飾)及太監李進忠(何廣沛飾)為救太子妃(王君馨飾),點知就穿越時空去到現代香港。三位男臣穿越到香港後,因為古代同現代嘅差異而鬧出唔少笑話。之後,佢哋仲每人發展一段感情。

《超時空男臣》

《回到三國》2012年

由林峯、馬國明和楊怡主演,劇情主要講述司馬信(馬國明飾)回到以前三國時期,更認識咗諸葛亮(林峯飾)與婢女(楊怡飾)丶劉備(李國麟飾)、張飛(曾偉權飾)及關羽(歐瑞偉飾)等英雄人物,佢哋仲一齊參與一幕又一幕歷史大事。

《回到三國》

《情逆三世緣》2013年

由當年最佳拍檔歐陽震華與關詠荷主演,劇集有三次穿越合共三世,包括宋代、1950年代香港及現代香港。劇情講述督察袁金昌(歐陽震華飾)錯手殺死女友楊夕雪(關詠荷飾),之後金昌靈魂出竅穿越時空去咗宋代與現代一樣樣貌嘅楊夕雪相遇,時光更回到50 年代,二人亦再一次重遇,真係可以話係宿世姻緣。

《情逆三世緣》

《巴不得爸爸…》2009年

呢套都係輕鬆穿越時空劇,劇情主要講述楚慈(吳卓羲飾)因為一次意外入咗衣櫃,穿越回到60年代嘅香港,仲要認識埋年輕時嘅爸爸楚帆(陳錦鴻飾)。楚慈原來性格較衝動,仲經常頂撞爸爸,不過經過同年輕嘅爸爸相處後,開始明白爸爸嘅做人處事態度。劇中除咗有吳卓羲穿越回到過去之外,喺大結局仲有楊思琦成功穿越嚟到現代香港。

《巴不得爸爸…》

《張保仔》2015年

由陳展鵬、洪永城及陳凱琳等主演嘅《張保仔》,最令大家記得嘅一定係無綫耗資3000萬製作CG效果,不過就被網民笑係小學雞程度嘅CG。劇情主要講陳凱琳飾演嘅女警,因為追查案件,點知意外穿越返去200多年前嘅清朝時代,之後佢仲認識到十一貝勒(陳展鵬飾)及海盜張保仔(洪永城飾)等人。

《張保仔》

《隔世追兇》2003年

劇集由郭晉安、陳慧珊及許紹雄等人主演,劇情講述重案組高級督察何天光(郭晉安飾),因為查案而以一部「大哥大」電話,呢部電話竟然可以與20年前嘅爸爸便裝警員何大河(許紹雄飾)通話。佢啲通話除咗破案之外,仲加深咗佢哋嘅父子情。

《隔世追兇》

《金宵大廈》2019年

上年大受歡迎時裝穿越奇幻劇《金宵大廈》,講述保安阿蕭(陳山聰飾)及空姐Coco(李施嬅飾)前世今生嘅愛情故事。去到尾段,阿蕭發現自己喺生死邊緣嘅事後可以穿越時空,於是佢苦求林老師幫助,希望可以拯救Coco。最後旭輝同Coco成功逃難,結果引起「蝴蝶效應」,就算阿蕭同Alex喺金宵大廈相遇,佢哋都只係陌路人。

《金宵大廈》

《誇世代》2017年

《誇世代》係一套劇情天馬行空到爆,加上陣容頂盛嘅台慶劇。當中陳豪及森美嘅「Hehe」感情線,真係去到而家都好令人難忘。劇情去到尾段,講述陳豪乘時空飛機到2047年,發現香港已變成廢墟。

《誇世代》