慶功坐主家席 謙虛魏惠文︰掹車邊啫

orientalsunday.hk

「娛樂圈呢行好奇怪,多勞未必多得,有啲人一出嚟就做男女主角,有啲人一個機會要等廿年,可能我係後者。」今年52歲的甘草演員魏惠文,近日憑《城寨英雄》中的衰老竇爛賭發一角廣為人知,佢在劇中賤到貼地,睇到觀眾咬牙切齒!落力演出終有回報,阿文近日有份聯同該劇其他演員出席宣傳活動,慶功宴上又獲安排坐主家席,威到盡!


阿文在《城寨》中飾演鑫鑫(林穎彤飾) 的爸爸爛賭發,終日流連賭攤欠下一屁股債,搞到女兒要到理髮舖打工幫補家計。佢得知惡霸夏滿(李嘉飾) 看上女兒,竟然二話不說就將鑫鑫拱手相讓,以抵償債項!

父女逃出夏滿的魔爪後,佢在賭檔被屈出老千!為免右手被打斷,佢再一次出賣鑫鑫,竟然要女兒將清白之身奉獻俾惡霸,話要陪瞓幾多晚都得,最後鑫鑫慘被輪姦至死… 簡直喪盡天良!


雖然阿文係好多人眼中的茄喱啡,但其實佢係90年演藝學院畢業生,師承戲劇大師毛俊輝,同屆有李婉華、劉玉翠和陳錦鴻等。不過佢加入TVB後一直發揮唔多,三四線角色都談不上,只係大茄。

雖然係做茄喱啡,但阿文堅持每一個小角色都要做得專業,咁先不辱自己母校。佢又坦承今次爛賭發呢個角色係「執三灘」,不過如果佢唔係一直堅持演戲到依家,就唔會得到呢個機會!


阿文在《城寨》中唔係咩重要角色,所以頭幾次宣傳活動都冇佢份。不過近日佢個角色備受讚賞,昨日最新的宣傳活動都預埋佢,仲可以企喺台前影單人相!

另外阿文在慶功宴上又獲安排坐主家席,可以同監製及一班主角同枱食飯!不過佢保持一貫的謙厚,話自己今個星期有少少戲份,所以先「掹車邊」可以出席慶功宴及宣傳活動,又話係李嘉同林穎彤演得出色的功勞。講到可以坐主家席,阿文就話係當日少演員去,張枱冇人坐而已。默默耕耘多年,人氣急升後依然謙虛,希望阿文將來有更多機會啦!

全文完

延伸閱讀:

《生命一瞬間2:高危險妊娠》7月8日(星期五)

王喜 明仔風雨同路十四載

賤價搶job 崔碧珈 陳婉衡胸走阿雪