惠英紅王浩信黐埋跳晒掣

東方日報
惠英紅與王浩信兩「母子」玩自拍!

「影后」惠英紅與「視帝」王浩信在重頭劇《刑偵日記》飾演精神有異的母子,惠英紅受幻覺纏繞,浩信則有多重人格,劇中歇斯底里,大鬥演技,惠英紅笑說:「我哋黐埋真係跳晒掣!」

惠英紅、王浩信、姜皓文、袁偉豪等昨日在將軍澳電視城為劇集《刑偵日記》拜神,無綫高層杜之克指新劇並非《鐵探》延續,希望為TVB拍出全新風格的驚慄作品!飾演母子的惠英紅與浩信,一個是精神病人,一個則有多重人格症,劇中大鬥演技,浩信說:「終於等到同紅姐合作,壓力嚟自想做得更好,演多重人格症難度一定有,做其他人格嘅時候要收埋王浩信先。」問浩信可有被對方氣場震懾?惠英紅則說:「唔會,佢都係高手,互相幫助同畀戲。劇中我有精神病,經常有幻覺,浩信有三個人格,我就有五、六種,對住三個仔有三種態度,每日開工都會問浩信你係邊個仔,今次算係我拍戲以嚟最難嘅一次。」

兩人在劇中有不少歇斯底里的爭執場面,惠英紅日前拍攝病發瘋癲亂打浩信的場口。問浩信是否再次被連環掌摑?他笑說:「都係嗰個方向啦!唔透露太多住。」惠英紅笑說:「我哋兩個黐埋直情係跳晒掣,佢要扮唔同嘅人,我又有好多唔同程度嘅幻覺,今次好大壓力,辛苦過拍動作戲。」

黎諾懿王敏奕多角戀

至於黎諾懿與王敏奕、浩信及黃智雯發生多角戀,與王敏奕首次合作的黎諾懿笑說:「後生女梗係要照顧多啲,智雯呢啲就唔使理啦!」演法醫人類學家的王敏奕指眾目睽睽下唸長對白最難,心理壓力很大,驚累大家遲收工。她又指近期頻頻出入醫院的奶奶情況穩定,並稱沒計劃生BB沖喜。

另外,「星夢一姐」菊梓喬獻出拍劇「第一次」飾演網絡編輯,拜神時有星夢高層何哲圖傍實支持,她稱角色的文青Look與她有點相似,為劇集造型試衫時還笑問監製角色是否為她度身訂造。

黎諾懿與王敏奕首次合作,笑言會多啲照顧對方。
菊梓喬拍劇飾演網絡編輯,過吓戲癮!