【恐怖得嚟又貼地】《金宵大廈》大獲好評有原因

無綫奇幻懸疑劇《金宵大廈》喺今個星期一首播,劇情主要講述金宵大廈看更阿蕭(陳山聰飾)及住客空姐Alex(李施嬅飾)嘅一段前世今生孽緣愛情,期間仲會講下大廈嘅一班住戶遇到唔同嘅怪事,劇集播出後大獲好評,更被網民激讚係年度神劇。

陳山聰飾演嘅看更阿蕭,蠱惑搞笑而且頻頻出現金句,唔少網民都大讚對白貼地,例如有「香港嘅樓市係全世界最恐佈,係最靈異嘅鬼故。」、「我醒目呀,10幾年前入定紙,有公屋住。」、「今時今日搵三萬住私樓,不如搵萬幾住公屋」!而最入腦果句「阿蕭精神,蠱惑過人」及「阿蕭精神,服務人群」入晒!

《金宵大廈》劇照

至於女主角方面,飾演空姐嘅李施嬅就真係要落足心機睇下佢演出啦,唔少網民都讚靚及演技到位,因為佢喺四月已經冇同無綫續約轉戰美加發展,而呢度劇集就係佢係無綫「尾二」嘅劇集(最後一套係《法證先鋒IV》)。

《金宵大廈》劇照

其他配角方面,有飾演手機鋪職員嘅林子善、書店老闆兼業主立案法團主席嘅劉江、小食店老闆嘅黃子雄及自由行導遊嘅黃祥興等等,佢哋除咗演技有返咁上下之外,人物性格相當突出,亦都係劇中一大賣點。

《金宵大廈》劇照

監製葉鎮輝把劇集以靈幻懸疑包裝嘅《七十二家房客》為藍本,繼而帶出社會各階層嘅不同問題,令劇集更貼地更容易令觀眾入局。

《金宵大廈》除咗懸疑成份吸引追看之外,亦都好多細緻位成為話題!就好似主題曲係陳百強嘅《今宵多珍重》由譚嘉儀翻唱,又有另外一番風味。另外,劇集取景於尖沙咀嘅香檳大廈,香檳大廈於60年代係知名嘅攝影器材店舖集中地,後來變為一樓一鳳嘅集中地。

《金宵大廈》由十個單元組成播出,所以中間插入收看亦未至於太過「斷片」。劇集陸續會出場嘅仲有高海寧、張曦雯、康華、譚凱琪及客串嘅「潘朵拉」林夏薇等等!希望會有更多驚喜啦!

《金宵大廈》劇照
《金宵大廈》劇照
《金宵大廈》劇照
《金宵大廈》劇照