張栢芝逆市中創業 凡事親力親為落力sell客

張栢芝

已成為三子之母嘅張栢芝,自從同霆鋒分手後感情一直無著落。但去年年尾就突然傳出懷孕並誕下第三子,「小王子」爸爸身份更一直無對外公開,令好多網民感到十分好奇。

栢芝除咗忙於照顧小朋友外,於2018年初更開始推出個人自家品牌。自家品牌產品包括衣服、裙、褲、手袋及飾物等。最近有指栢芝仲逆市中創業,為網店變為實體店,舖頭面積大約一千尺,仲係喺中環,同前夫謝霆鋒嘅舖頭好近。想打入時裝王國嘅栢芝仲係一位初哥,所以初時生意只供客人網上購物衣服,而各產品價錢非常親民,一件Tee都係數百元!

有傳媒報道指喺剛剛嘅星期六(21日),老闆娘栢芝開始樣樣親力親為,更即時穿上只賣300多元嘅自家熱褲落力宣傳。當日嘅開張活動並冇完全公開,只係透過個人社交平台宣傳。開張當日有記者想上前訪問,但都被栢芝拒絕。

雖然唔接受傳媒訪問,但栢芝非常歡迎唔同客人,周不時親自介紹唔同產品,務求凡事親力親為。當日栢芝更有唔同好友撐場,當中包括李浩林及張文慈等等。當李浩林買完之後,栢芝更話仔仔學費多謝佢。今次開店係咪就係想努力賺更多錢俾三個仔仔有更好嘅生活呢?