張景淳融入家中氹掂呂慧儀囝囝

東方日報
張景淳笑言會封利是給呂慧儀囝囝。

藝員呂慧儀、張景淳、陳偉琪、鄭世豪等昨日在將軍澳電視城出席《愛·回家之開心速遞》賀年活動,緋聞情侶呂慧儀與張景淳被問新年會否互相拜年,她表示今年未必出街,因要陪「蟹子」踩Roller。張景淳則笑謂一定會封利是給「蟹子」:「蟹子叫我Stanley哥哥,我都係大細路,會同佢傾動漫。」呂慧儀笑說:「你試吓畀少呀,今年一定冇好日子過。」又指每年也會幫兒子儲起利是錢,又幫他開銀行戶口投資,講到桃花運,她說:「今年係辛苦得財年,努力做嘢先,唔諗感情。」

陳偉琪堅稱單身

而「細龍太」陳偉琪涉嫌醉駕案件仍在審理,出事後她曾飲泣認錯誓神劈願話戒酒,但近日卻被發現在灣仔帶醉跟「老翻湯漢斯」外籍男士又攬又錫,更被指背着健身教練男友溝仔,她說:「嗰日一齊食飯,嗰杯係apple cider嚟,只係好少酒精,我哋仲share一齊飲。(會唔會真係戒晒酒?)我真係飲好少,總之飲酒之後就一定唔會揸車。(本身唔係拍緊拖?)我冇男朋友,已經單身咗一排,我都有講過,只係一直冇人相信。(同老外咀晒都唔係拍拖?)我係有啲鬼妹仔,有啲熱情,我會收番少少。佢依家好嬲,因為話佢係Tom Hanks,佢話自己應該係Tom Cruise喎,我咁難得有人追,依家仲未知係咪男朋友,不過依家佢都嚇窒咗,希望畀啲空間我!」

陳偉琪拒絕「老公」鄭世豪錫錫!