張建聲40日操甩23磅面青休克!

東方日報
Justin瞓地昏迷,幸好身邊人及時發現!

演員張建聲為拍戲狂操身形,短短40日激減23磅,操之過急的他一度休克昏迷,嚇壞身邊人!他憶述出事當日面色慘白,情況不理想,幸好拍檔及時叫醒他,否則後果堪虞。

36歲的張建聲(Justin)多年來為拍戲豁出去,不時增肥或減磅塑造角色,早前就為了演電影《一秒拳王》拳手一角,挑戰在40日內極速由193磅減至170磅,以地獄式方法完成任務。

Justin每日狂操6小時,當中包括大量帶氧運動、重量訓練及拳擊,運動期間更穿上特製的「焗汗衫」加速排水,飲食方面則戒糖和油,只食烚雞肉及烚蛋白加水。由於操練過度,他的身體一時間未能適應,減磅期間曾出現休克,情況危急!

脫水苦不堪言

出事當日,Justin剛完成6小時訓練,之後突然暈倒,起初拍檔以為他只是累到睡着,還貪玩偷拍,後來才發現他面色慘白兼沒反應,此時才嘗試拍醒他。當時Justin動也不動,一段時間後才甦醒,他憶述:「醒番都斷咗片,完全唔知自己幾時瞓低咗,好彩佢哋及時叫醒我,否則都唔知幾時醒!」

短短40日內,Justin由圓潤中佬變成爆肌男,直言今次減磅是最辛苦的一次,尤其拍攝前夕要脫水,苦不堪言:「拍攝前3日要脫水,就算幾口渴都只能夠食粒冰,濕吓個口,狂做運動又冇水飲,個人真係好虛脫!」

Jeana爆開工有古怪

Justin已非首次為拍戲折磨自己,今次「犧牲」更有兄弟情包含其中,他坦言:「呢套戲導演係趙善恆,幾年前搞呢個劇本,當時已經講過一齊做,呢個係兄弟間嘅承諾。雖然只得40日時間,真係好艱難,但我都照做,唔會托手(月爭)!」

對於Justin狂操,結果一度休克,其舊愛陳嘉莉表示:「佢每次演出都瞓晒身,我喺社交平台見到佢瘦咗好多。(會唔會打畀佢慰問吓?)佢咁大個人識得照顧自己,冇事嘅。」至於女星何珮瑜(Jeana)與松岡李那都曾與Justin合作,她們異口同聲指他好搏命,Jeana說:「拍《作家的謊言》嘅時候,佢試過撼崩咗隻牙,成口血都繼續拍。同埋佢開工前,有時會睇住啲強光,應該係想谷眼水。」

陳嘉莉留意到舊愛Justin瘦了不少。
張建聲接受地獄式考驗,由肥佬變肌佬。
張建聲