張建聲蛋蛋受創 痛不欲生

東方日報
為免阻礙拍攝進度,張建聲忍痛開工。

張建聲前晚拍廣告時不慎傷腿,還牽連「蛋蛋」,然而他選擇忍痛工作,幸傷勢並無大礙。其女拍檔陳欣妍(Shirley)於廣告內被力追,卻自爆現實生活中曾向異性示愛,最終慘食檸檬!

張建聲、Shirley及資深演員廖駿雄前晚齊集大埔工業邨,為網上購物平台拍廣告。今次製作相當認真,出動武指負責「度招」,讓張建聲一顯身手,想不到他一時不慎,因應劇情需要跳欄時發生小意外:「當時踩中工作人員條褲,成個人凌空掛喺欄杆上,隻腳扭曲成脆麻花,好彩未算好嚴重,如果唔係條韌帶就冇嘞,不過同時『銀』中咗『蛋蛋』,都痛不欲生(口架)!」

凍飲按腳減輕痛楚

由於趕工關係,張建聲僅以冰凍飲品樽身按腳,以減輕痛楚,且自信的說:「自己檢查過嘞,應該冇太大問題,過幾日就冇事。」然而見他走路仍一拐一拐,偶爾露出痛苦表情。

張建聲於廣告內與「人氣女神」Shirley展開情緣,一身貼身露臍打扮的Shirley笑謂:「佢會赴湯蹈火咁送唇膏嚟我面前,等我扮靚靚出席活動,感覺好浪漫。(現實生活試過?)梗係冇啦,以前拍拖都好順其自然,大家冇刻意去經營。」

陳欣妍示愛食檸檬

Shirley因性感行山而打響知名度,卻遭沈震軒「快人一步」私有化,而她是屬於敢愛敢言的女性:「我份人比較直截了當,唔鍾意估估吓,以前試過鍾意咗個男仔,唔怕醜直接向對方示愛。(成功?)最終佢冇接受我,不過我覺得食檸檬冇問題,最緊要大家搞清楚嘛。」

行山行到出晒位的陳欣妍,原來也有過求愛不遂的經驗。