張兆輝闖「疫區」掘金 搵命博!

東方日報
張兆輝及陳豪受內地客戶歡迎,齊齊北上掘金。

年底本屬明星商演黃金檔,惟近期經濟低迷,港星的除夕夜商場演出更出現「零騷」狀況,有機會賺錢自然要好好把握!雖然近日武漢爆發疑似「沙士」的不明肺炎疫情,但張兆輝和陳豪等難得遇上內地商演招手,為了「掘金」,不惜深入疫區搵命博!

香港市道低迷,經濟不景,藝人慣常於年底到內地商演及在港演出商場騷,但近期陷入「冰河期」,剛過去的除夕香港商場慶祝活動,由以往數十個變為零!嚴峻情況令港星恐慌,眼見黃金期不再,他們不敢再揀擇,總之有錢就搵,積穀防飢。不過,武漢近日爆發疑似「沙士」的不明肺炎,難免令北上掘金的藝人有憂慮,而張兆輝和陳豪日前成行前往「疫區」武漢商演,為免推Job賠錢,他們只好「自我裝備」,在當地做足防護措施,拒食野味、戴口罩、勤洗手,嚴防將病菌帶回家傳染家人!

大膽同市民握手

張兆輝前日出發,昨晚完成活動立即返港,他透露返港航機上,全機只有他一人戴口罩,網傳有全副保護裝備的人員,在武漢飛香港的航班上向旅客作病情說明,輝仔卻說:「冇睇過!出發時感冒啱啱好番,所以我係咁食維他命C增強抵抗力,返香港又換晒衫、沖晒涼先敢入房,亦唔敢錫一對仔女,去到依家都冇覺得唔舒服先放心。因為嚟緊要全力宣傳無綫新劇《黃金有罪》,唔可以病!」

問到在當地工作,是否有避免進食野味和海鮮?他說:「事前同主辦方講明唔食野味,所以只係招呼我去一間網紅食店,有食當地出名嘅鹹肉同腸。不過始終係工作,我有同武漢嘅市民接觸,例如握手咁!(有冇擔心?)接呢個商演時係兩個月前,未有肺炎發生,不過都擔心(口架)!始終經歷過沙士比較敏感,但唔去要賠錢,所以要去!」問到家人可有阻止他前往高危地區工作?他說:「因為經常飛,佢哋一向唔會問。不過連吳啟華喺內地做活動知道我喺武漢,都傳訊息提我小心啲,真係多謝大家關心!」

陳豪「淨身」怕播菌

同樣到當地商演的陳豪,家中子女更年幼,最大只得6歲,兒童抵抗力弱,自然更要小心防範!他昨日接受本報訪問時坦言防護措施樣樣做足:「啱啱返到香港,沖晒涼、換哂衫先入屋,因為仔女細,要小心啲!(有冇自我隔離?)咁又冇,因為都做足安全措施!(當地氣氛緊張嗎?)佢哋如常咁,冇香港新聞講得咁誇,但自己做足準備,好似戴口罩、勤洗手!(有冇離開酒店?)冇啦,唔會周圍去,留喺酒店食嘢,安全啲。」

另外,黃榕將於本月18日到武漢參加群星演唱會,她透露會如期演出:「好耐之前定落,負責單位冇話改期或取消,我會戴口罩、食定健康食品同洗多啲手,我平時身體好,都唔驚嘅。而且演唱會喺體育館搞,地方大距離觀眾好遠,亦唔會握手。」

為保健康,張兆輝當然要戴口罩防疫。