廣州同志電影節 出呢招唔怕河蟹

中國電影票房同自家產量一樣好澎湃,但澎湃唔等如多元,開拍咩片同引入咩外語片全部都要經國家電影局做審批程序,所以邊啲唔會有得睇?只有精神病而無鬼片、國家很強大而且無黑警、唔會有逆權公民仲當然要維護傳統家庭價值而沒有同性戀題材。

現實係人口眾多,性向多元,連女士都很愛睇hehe BL劇(網剷《上癮》紅到癲,即禁!),銀幕上從來沒有光明正大地描寫過同性戀,頂多拍劇踩個小界,叫2個男主角玩下少少粉紅。

不過,有求自然有供,何況睇好戲呢啲咁正確的需求!剛剛廣州就舉辦「2018廣州LGBT電影節」,唔係話唔俾有同志片咩?主辦方好聰明地,聯絡不同國家的中國領事館,將領事館變做放映場地,成個電影節仲係免費嘅,要睇戲只要帶埋身份証去領事館登記就得啦!

咩叫「你有張良計,我有過牆梯」?呢個電影節就展示咗,某種內地生活嘅秘技。喂,要用身份証登記,其實會唔會係另類點相架?希望不久的將來,睇同志電影節唔駛咁辛苦啦。

講返個節,片單包括:

《愛.面子》(Saving Face,陳沖主演)

《以你的名字呼喚我》(Call Me by Your Name)

The man who loved Yngve (2008年挪威出品)

Closet Monster

Sparrow