【年尾盤點】2017娛樂圈大事回顧

2017年即將過去,回望今年嘅娛樂圈發生好多大小事,當中有喜有悲,亦有啲令人回味,而家就同大家一齊回顧本年度娛樂圈發生嘅大事啦!

劉德華墮馬

劉德華於1月17日喺泰國拍廣告時不慎墮馬受傷,造成盆骨多處骨折,情況嚴重。 第二日立即乘坐醫療專機返港。由於傷勢唔輕,年底紅館演唱會及其他工作亦宣布取消。華仔休養203日後,終於喺8月8日現身公開場合,到北京宣傳新戲。

方逸華逝世

影視大亨「六叔」邵逸夫於2014年辭世,而邵逸夫第二任妻子方逸華喺11月22日因病安祥離世, 終年83歲。方逸華本來係歌手,直到1969年加入邵氏兄弟電影公司,幫邵逸夫打理成個電視王國,變成叱吒影視界嘅女強人。方2012年3月退休,轉為非執行董事。方逸華逝世消息震撼娛樂圈,好多演員認為方小姐為人公私分明,有情有義,員工有經濟困難,佢都會私底下幫手,一眾演員都深表哀悼。

ATV翻生

亞洲電視(ATV)於去年4月熄機,今年12月就宣佈亞視以OTT形式搞網絡電視翻生。不少以往為無綫效力的舊將都已經加盟亞視,包括前高層吳雨、何麗全、區偉林及藝人陳志雲、朱慧敏同曾華倩等。早前,亞視話計劃重拍經典劇集《我和殭屍有個約會》,不過佢哋喺15年已經將28部電視劇集嘅版權賣咗俾FOX,當中包括《我和殭屍有個約會》系列、《肥貓正傳》及《情陷夜中環》等等,而FOX仲出咗版權聲明,提佢哋《我和殭屍有個約會》嘅版權係由FOX獨家擁有。亞視最近製作緊《百萬富翁》,想知亞視有咩節目出街,大家就要拭目以待啦!

Big Big Channel登場

無綫自家免費新App《Big Big Channel》喺7月全球啟動,全台藝人都可以喺App做網上開Live或者上載影片,同大家share佢哋嘅最新動態,甚至有藝人為咗呃Like網上直播老婆生仔等等。另外,無綫又安排綜藝節目《明星麻雀王大賽》、《12瞞逃》、《美女廚房》等及推出網絡劇《降魔的番外篇 - 首部曲》。

無綫「限奶令」


無綫喺11月發出「限奶令」,指示以後拍強姦及床上戲,只可以用意會形式交代。如果女藝人要拍攝三點式或浸溫泉鏡頭要外穿T-shirt,仲要求女藝人係鏡頭前收起性感。觀眾冇得喺電視機前睇女藝人大騷身材啦!

吳綺莉 卓林 家事糾紛

吳綺莉嘅17歲囡囡吳卓林,早前先後兩次以涉毒與刑事恐嚇,報警拉阿媽吳綺莉,關係一度緊張。之後,卓林喺社交網站宣布出櫃,同30歲同性外籍女友Andi喺北角劏房同居。吳綺莉又報警聲稱寓所失竊,損失約17萬財物,但卓林聲稱事前已發短訊通知媽媽回家取物件,二人關係可謂非常複雜。