【年尾盤點】2017年娛樂圈喜事重重之生仔篇

2017年娛樂圈喜事重重,好多藝人都排住隊結婚生B,淨係生BB嘅多到十隻手指都數唔晒,等我地回顧一下啦!

Angelababy 

Angelababy於1月17日生咗囝囝小海綿,成為2017年首個生B嘅藝人。Angelababy同老公黃曉明都對囝囝十分保護,從未發放任何正面照。早前俾傳媒「野生捕獲」小海綿正面照,黃曉明立即懇求傳媒放過囝囝。

周汶錡

43歲嘅名模周汶錡於3月20日再為法籍老公Julien生多個囝囝Avner。Kathy經常喺社交媒體上載囝囝嘅日常照,見到Avner同哥哥個樣十分相似,都遺傳咗嗲哋媽咪嘅靚樣。

蘇永康

蘇永康同圈外老婆Anita於3月20日誕下愛子蘇展弘(Jazz)。蘇永康圈中朋友眾多,以為Big Four會做Jazz嘅契爺,估唔到契爺竟然係男神黃子華,羨慕死人啦~

謝安琪

謝安琪(Kay)於3月23日誕下細女張靖(Karina),加埋大仔張瞻湊成一個好字。Karina勁可愛,生得好似爸爸張繼聰。張繼聰唔駛工作時都做湊女公,仲經常上載分享同「小情人」嘅合照。

楊愛瑾

楊愛瑾(Miki)於3月30日 為郭永淳生下兒子Luken,而家Miki有仔萬事足,每天弄兒為樂。Luken個樣同爹哋郭永淳餅印一樣,有「迷你版郭永淳」之稱。

黎諾懿

黎諾懿同圈外老婆於4月10日誕下囝囝「小春雞」。黎諾懿經常分享「小春雞」日常照,「小春雞」精靈可愛,又經常面露笑容,成功吸引咗一班粉絲。

吳若希

現年24歲嘅吳若希於4月22日生左小公主Giselle,澳門闊少男友Alex陪住佢生BB。吳若希大爆Alex見到出世谷到眼紅晒,仲唔怕血親手剪臍帶。

林盛斌

林盛斌已經擁有3女,一直俾人話係「天生外父相」。今年8月21日終於打破宿命,成功追到仔仔Jaye,Bob仲幫囝囝改花名做「大兜仔」。

郭富城

「城嫂」方媛今年9月10日低調為天王郭富城生下女兒Chant。郭富城表示囡囡3個月大已經識叫媽媽(!!),仲讚囡囡眼睛好大,好得意,仲放定口風話等囡囡大個啲會分享她嘅正面照。

胡杏兒

胡杏兒於10月10日生左8磅重嘅囝囝Brendan,五官清秀,非常可愛,老公Philip更寫下千字文感激老婆杏兒嘅付出!

今年成為新任父母嘅藝人,計計埋埋起碼有30位,真係恭喜晒你哋呀!